“ფეხსაცმელი დაიწვა და ყუთი არა?” – ვინ და როდის გაქურდა ბაზრობა? – “ჩვენი ცოდვით ეს მთავრობა ვერ გაიხარებს”

ხმაური და დაპირისპირება იყო “სადგურის მოედანზე” – დაზარალებული  მოვაჭრეები გადამწვარი ბაზრობის ტერიტორიაზე შეშვებას ითხოვენ.  ე.წ. ბორჯომის ბაზარში დასაქმებულებს აქვთ ეჭვი, რომ ჯერ გაქურდეს და შემდეგ გადაწვეს, იცოდნენ, რომ უნდა გადაეწვათ.

რამდენიმე მოვაჭრემ ადგილზე პოლიციის კორდონის გარღვევა შეძლო და დამწვარი ბაზრის ტერიტორიაზე შევიდა, თუმცა ისინი პოლიციის წარმომადგენლებმა ძალის გამოყენებით გამოიყვანეს.

მოვაჭრეები, ტვ პირველის ეთერით, უამრავ ცარიელ ყუთს გვაჩვენებენ და ამბობენ:

ყველა ცარიელია, ყველა ყუთი, სავსე ყუთები სად წავიდა? ქაღალდები და ცარიელი ყუთებია, ვინ მოიპარა? ეგაც დაიწვა? და ყუთი არ დაიწვა?

ხალხო, სულელები ხომ არ ვართ? სად წავიდა საქონელი?

ფეხსაცმელი დაიწვა და ყუთი არა? ჩვენი ცოდვით როგორ უნდა გაიხაროს ამ მთავრობამ, რას გვერჩის, რითი ვერ გაძღნენ? ჩვენც ხომ გვინდა საარსებო წყარო?

ამდენი ადამიანი ვართ დაზარალებული, დაგვიდგეს გვერდით ხელისუფლება, 14 000 კვადრატი როგორ შეიძლება საათნახევარში დაიწვას?

ფერფლი მაჩვენეთ მაშინ ჩემი საქონლის, რატომ გაზიდეთ სანამ დაიწვებოდა? რატომ არ მოდის მერია დასახმარებლად? მთელი 4 წლის ნამუშევარი რომ წყალში ჩაგვიყარეთ. 

ეგრეთწოდებული ბორჯომის ბაზრობის ტერიტორიას გომელაურის პოლიციის ცოცხალი კედლით და რკინის ჯებირებით იცავენ.   სადგურის მოედანზე გაჩენილი ხანძრიდან უკვე მეორე დღეა გასული, თუმცა დაზარალებულ მოვაჭრეებს ამ დრომდე თვალით არ უნახავთ მერიის წარმომადგენლები. ისევე, როგორც უცნობია ხანძრის მიზეზი.

დღეს კი უკვე გაჩნდა არაერთი დამატებითი კითხვა, თუ გადამწვარ ტერიტორიას შსს იცავს, თუ მოვაჭრეებს შესვლას უკრძალავენ, როგორ დაიკარგა შსს–ს მიერ შემოსაზღვრული ტერიტორიიდან ნივთები? ვინ მოიპარა? მართლაც ხანძრის გაჩენამდე გაიქურდა ბაზრობა, თუ ხანძრის შემდეგ, მაშინ, როცა მას შსს მოვაჭრეებისგან იცავდა? თუ შსს ვერ ახერხებს ტერიტორიის კონტროლსაც კი, რატომ არ აძლევს მოვაჭრეებს მაშინ შესვლის და კონტროლის უფლებას?

ადგილზე შპს “ბაქანის” დირექტორი და 35%-იანი წილის მფლობელია თორნიკე წერეთელი მოვიდა, თუმცა ის ამბობს, რომ გამოძიების დასრულებას ელოდება. ახლა კი “პასუხი არაფერზე არ აქვს”.

ე.წ. ბორჯომის ბაზრის ტერიტორიაზე გაჩენილი ხანძრის შედეგად 15 ათასამდე კვადრატული მეტრია დამწვარი. ხანძრის გამომწვევი მიზეზები ჯერჯერობით უცნობია.