ადგილების არქონის გამო, ლაგოდეხში, კორონავირუსით პაციენტი გარდაიცვალა, ამის შესახებ ინფორმაციას ადგილობრივი მერია “ჰერეთი” ავრცელებს:
საზოგადოებრივი ჯანდაცვის ლაგოდეხის სამსახურის დირექტორი ნუნუ ნოზაძე, რადიო ჰერეთთან საუბრისას აცხადებს, რომ ლაგოდეხის „არქიმედეს“კლინიკის ცხელების ცენტრში, სიღნაღის მკვიდრი, 60 წელს გადაცილებული მამაკაცის შესაბამისი მკურნალობა ვერ უზრუნველყვეს.
კლინიკა „არქიმედეს“ სამედიცინო დირექტორი ნიკოლოზ ყარალაშვილი რადიო „ჰერეთთან“ ადასტურებს კორონავირუსით ინფიცირებული პაციენტის გარდაცვალების ფაქტს და მიზეზად კოვიდკლინიკებში ადგილების უქონლობას ასახელებს.
ექიმები და კლინიკის ხელმძღვანელები როცა ვეღარ და აღარ მალავენ ფაქტს რომ პაციენტები ადგილების არქონის გამო ეღუპებათ, ჯანდაცვის მინისტრი და დაავადებათა კონტროლის ხელმძღვანელი კი იძახიან, რომ ყველაფერი კარგადაა და ადგილები აქვთ – იმ ქვეყანას არჩევნები საერთოდ არ სჭირდება, რაღაა ასარჩევი, უნდა ადგეს და წავიდეს ყველა ერთად!!!
გარდა იმისა, რომ ინფექციური კლინიკაში ისევ წყალი ჩადის, სამარცხვინოდ, ქვეყნის ნომერ პირველ წოდებულ კლინიკაში, წვიმს, ზაფხულის მანძილზე, ჯერ შიდა ტურიზმის ძახილით გაყარეს ხალხი კურორტებზე, მერე ექიმებს 400-კაციანი კონფერენციების ჩატარების უფლება მისცეს და თან ლანძღეს, გახსნეს სკვერები, პარკები, ჰქონდათ შეხვედრები, იარეს პირბადის და დისტანციის დაცვის გარეშე და ბოლოს ისევ ყველაფერი ხალხს დააბრალეს. ქვეყანა ჩაკეტეს და ხალხი დაამშიეს, პარალელურად კი მოხუცთა თავშესაფრებში ინფექციის გავრცელება ვერ შეაჩერეს. ერთი დიდი კოვიდჰოსპიტალის მოწყობა რა გახდა? რა გახდა ადგილების დათვლა?
სანამ თრომბით არ დაეღუპათ ადამიანი კოვიდსასტუმროში, მანამდე თრომბის თავიდან ასაცილებლად ანალიზების გაკეთებას ვერ მიხვდნენ!
დღეში რომ 2000 ახალი ინფიცირებულია, ახლა გვეუბნებიან სადღაც, სახლებში, დიასახლისებად, დიპლომიანი ექიმები გვყავს, რომ არ უმუშავიათ, მაგრამ დიპლომები აქვთ და იმათ გამოვიყვანთ და გადავამზადებთო, აწი გამოვიყვანთ და გადავამზადებთო!
ვინც მუშაობს და მოქმედი ექიმია, ის ვერ გადაამზადეს და ხაჭაპურის დაცხობას და ნათურის გამოცვლას მიატოვებინებენ ადამიანს, გამოიყვანენ და იმას გადაამზადებენ? და წამოვა? ამ სისტემაში მუშაობას მოინდომებს? მოინდომებს იმის ნახვას, ხალხს როგორ ხოცავთ იმის გამო, რომ ადგილები არ გაქვთ?
ახლა ყველა კლინიკა კოვიდკლინიკა გახდებაო და ქრონიკული ავადმყოფები სად წავიდნენ? ვინც დიალეზზეა, სად იაროს?
რა ვერ გაიგეთ, კოვიდი კი არ კლავს, უადგილობა და უექიმობა, უთავბოლო კლავს და ამას წერს “ალია” ზუსტად 26 იანვრიდან მოყოლებული!
პრემიერი ხომ არის ანტიკრიზისული საბჭოს ხელმძღვანელი? წაუძეხით მატყუარა გუნდს პრემიერო და მიბრძანდით! რას ჰგავს ეს – გვითხარით, რომ ადგილები არ გაქვთ და არც სასწრაფოს დაველოდებით და თავად მივხედავთ თავს, ის დიპლომიანი ექიმებიც გამოვლენ და თქვენ კლინიკებში კი არა, გარეთ იმუშავებენ ხალხთან, დავდებთ ფულს და ერთ ლაზარეთს მოვაწყობთ, მოვალთ და წამოვიღებთ სასუნთქ აპარატებს, რა იყო, ჩვენი ფულით ხომ არის ნაყიდი? თქვით, რომ ვერ ართმევთ თავს და ბოლოს და ბოლოს დაიხმარეთ დამოუკიდებელი ექსპერტები! მიაღწიოთ იქნება ასე არჩევნებამდე მაინც!
კომენტარები