ოკუპირებული ცხინვალის მარიონეტული რეჟიმი საქართველოს საგარეო საქმეთა სამინისტროს მიერ 2008ნ წლის აგვისტოს ომთან დაკავშირებით გამოქვეყნებული განცხადებას გამოეხმაურა. რეჟიმი კობახიძის განცხადების ფონზე აცხადებს, რომ ომზე პასუხისმგებლობა არა მხოლოდ “სააკაშვილის რეჟიმს”, არამედ “ქვეყანას უნდა დაეკისროს” და საქართველოს “მეტად კონსტრუქციული პოზიციის” დაკავებისკენ მოუწოდებს.
მარიონეტული რეჟიმი საგარეო საქმეთა სამინისტროს მიერ რუსეთისთვის ტერიტორიების ოკუპაციის შეწყვეტისკენ მოწოდებას აკრიტიკებს – რეჟიმის განცხადებაში ნათქვამია, რომ განცხადებამდე ერთი დღით ადრე “საქართველოს პოლიტიკურმა ხელმძღვანელობამ, ირაკლი კობახიძის სახით სამხედრო აგრესიაში დამნაშავედ” სააკაშვილი ოფიციალურად ცნო, თუმცა პასუხისმგებლობა “ქვეყანას უნდა დაეკისროს”.
“ეს თავიდანვე ცნობილი იყო და ამის შესახებ სამხრეთ ოსეთი გასული 18 წლის განმავლობაში აცხადებდა. ასევე სრულად ნათელია, რომ დამნაშავე მხოლოდ სააკაშვილი არ არის. მას, როგორც სახელმწიფოს მეთაურს, საქართველოს სახელმწიფოს სახელით მოქმედების, დანაშაულებრივი ბრძანებების გაცემის, ანტიოსური და ანტიაფხაზური პოლიტიკის გატარების მანდატი ჰქონდა.
ამიტომ, 2008 წლის აგვისტოს ომზე პასუხისმგებლობა უნდა დაეკისროს ქვეყანას, როგორც ამ პოლიტიკის სუბიექტს, მათ შორის, სააკაშვილის რეჟიმის პერსონაჟებსაც, როგორც ობიექტებს, რომლებიც ამ პოლიტიკას ასრულებდნენ”. – წერია მარიონეტული რეჟიმის განცხადებაში.
ოკუპირებული ცხინვალის ე.წ. საგარეო საქმეთა უწყებამ ქართულ ოცნებას “სხვა ქვეყნების საქმეებში ჩარევის მცდელობების შეწყვეტისკენ” მოუწოდა და აღნიშნა, რომ რუსეთი მათთვის “უსაფრთხოების საიმედო გარანტად” რჩება. მათივე მტკიცებით, რუსეთსა და ოკუპირებული რეეგიონის მარიონეტულ რეჟიმს შორის “მშენებარე ორმხრივი ურთიერთობებს მყარი სამართლებრივი საფუძველი აქვს”.
“ოფიციალურ თბილისს მოვუწოდებთ, რომ სხვა ქვეყნების საქმეებში ჩარევის მცდელობები შეწყვიტონ და მეტად კონსტრუქციული პოზიცია დაიკავონ, მათ შორის, საერთაშორისო დისკუსიები სამხრეთ კავკასიაზე (МДЗ) ფორმატში მუშაობის ფარგლებშიც”. – წერია მარიონეტული რეჟიმის განცხადებაში. (ტაბულა)
კომენტარები