“თავისუფალი საქართველოს“ თანათავმჯდომარე გოგი წულაიამ საზოგადოებას თავი სახალისო პერფორმანსებითა და ფრაზებით დაამახსოვრა, თუმცა, ჩვეულ პერფორმანსებსა და ემოციურ გამოსვლებზე დროებით უარის თქმა მოუხდა. მან ცოტა ხნის წინ გულის მძიმე შეტევა გადაიტანა. მედიკოსებმა, დროული ჩარევის შედეგად, გოგი წულაიას სიცოცხლე შეუნარჩუნეს.
ჯანმრთელობის მდგომარეობისა და წინასაარჩევნო გარემოს შესახებ „თავისუფალი საქართველოს მაჟორიტარი დეპუტატობის კანდიდატი გოგი წულაია “2020NEWS”-ს ესაუბრა.
– ბატონო გოგი, თქვენი ჯანმრთელობის მდგომარეობის გამო, მთელი საქართველო გგულშემატკივრობდათ, როგორ ხართ ახლა?
– „მთელი საქართველო“ ნამდვილად გაბუქებულია, მაგრამ თვითონაც გაკვირვებული ვარ, რამდენი ადამიანი მგულშემატკივრობდა და მხარდაჭერას მიცხადებდა, რისთვისაც ყველას დიდ მადლობას ვუხდი. რაც შეეხება ჩემს ჯანმრთელობას, გადავიტანე ინფარქტი, წამებში მოხდა ჩემი გადარჩენა, შემდეგ საჭირო აღმოჩნდა შუნტირების ოპერაცია, ოთხივე სისხლძარღვი გამომიცვალეს, ახლა თავს უკეთ ვგრძნობ. საარჩევნო კამპანიაში ჩავერთე, მაგრამ არა ძველებურად, იმ პერფორმანსებსა და ბრიფინგებს, ჯერჯერობით, ვერ ვახერხებ.
პარტიის ინტერესების გათვალისწინებით, კენჭს ვიყრი სამტრედია- წყალტუბო-ვანი-ხონის მაჟორიტარად. პარტიაში ეს გადაწყვეტილება ახალი მიღებული იყო, როდესაც გულმა შემომიტია. ვაპირებ, შევხვდე მოსახლეობას, თუმცა, ამ ხალხის გასაცნობად, ახლა არ მივდივარ, ყველა პრობლემის დროს, მათთან ვიყავი. არჩევნებამდე დარჩენილია სამი კვირა და ეს საკმარისი დროა, ამ არჩევნებში მე ჩემს სიტყვას მაინც ვიტყვი.
რა თქმა უნდა, კაკო ბობოხიძე ანგარიშგასაწევი ძალაა, ნანუკა ჟორჟოლიანი ჟურნალისტია და ცნობილი ადამიანია. გივი ჭიჭინაძე კარგი კაცია, მაგრამ „ოცნების“ გარეშე ვერაფერი ანგარიშგასაწევი კონკურენტი იქნებოდა…
წინასაარჩევნო გარემო არის ისეთი როგორიც აქამდე იყო – ორპოლუსიანობის მცდელობა და ფულიანის დომინანტობა. არ არსებობს კონტროლი და ბალანსი პარტიებს შორის ფულის ხარჯაზე. ეს, რა თქმა უნდა, დისკომფორტსა და პრობლემებს გვიქმნის. ამ ქვეყანაში ვიდრე ასე იქნება – „ბევრი ფული მაქვს, დავხარჯავ და მერე ამ ფულს ისევ ამათ კისერზე ამოვიღებ“, ძნელი იქნება რაიმეს შეცვლა. ეს უნდა დამთავრდეს.
კომენტარები