ჩვენც გვქონდა ხარვეზები. აშკარად არასწორი, ცოტა პოპულისტური იყო ჩვენი გადაწყვეტილება, რომ კარვები გაგვეხსნა ბათუმში, – ამის შესახებ დაავადებათა კონტროლის ცენტრის დირექტორის მოადგილემ, პაატა იმნაძემ განაცხადა.
მისი თქმით, ბათუმში ტესტირების კარვების გახსნამ ლაბორატორიების გადატვირთვა გამოიწვია.
„ამან გამოიწვია ის, რომ ყველა ცნობისმოყვარე იკმაყოფილებდა ცნობისმოყვარეობას. ამან გამოიწვია ლაბორატორიების გადატვირთვა და შემდეგ, უკვე პასუხები დაგვიანდა იქ, სადაც პასუხები ადამიანებს დროულად უნდა მიეღოთ.
ეს იყო ჩვენი შეცდომა. შეცდომა არ მოსდის მას, ვინც არაფერს აკეთებს. მერე კრიტიკა ადვილია მათთვის ვინც არაფერს აკეთებს”
ხო… უცნაურია, ღმერთმანი, კლინკები მზად არ აღმოჩნდა, საწოლფონდი, მართლა ქუჩა-ქუჩა ეძებეს, “ინფექციურში” წყალი ჩადის, ოჯახის ექიმები გადაუმზადებელია, 112- პარალიზებული და კარვების დადგმა იყო შეცდომაო?
მთელი ზაფხული არაფერს რომ არ ვაკეთებდით, ლაბორატორიებიც არ იყო მზად? არც ის იცოდით, დღეში რამდენი ტესტი უნდა გაგეკეთებიათ, რომ ლაბორატორიები არ გადაგეტვირთათ? ლაბორანტების მობილიზებაც არ გააკეთეთ? – ხოო… ეს ერთი თუ შეგეშალათ, ბატონო პაატა! რა იყო, იმ საკოორდინაციო საბჭოში ხომ თქვენც იღებთ მონაწილეობას? თუ თქვენც ყველაფერს მინისტრს და პრემიერს გადააბრალებთ?
ისე, ამ ერთმა შეცდომამ რა მოგვცა? – ბევრი ტესტი და ბევრი ინფიცირებული – რომელს ნანობთ, ბატონო პაატა, ლაბორატორიის გადატვირთას, თუ ინფიცირებულთა რიცხვის მატებას? თუ არ იყავით მზად, უსიმპტომო პაციენტების დასათვლელად, რატომ დაიწყეთ დათვლა? რაო, მაინც ვინ გირჩიათ მთელი ზაფხული უსაქმურობა და სექტემბერში კარვების დადგმა და დატესტვა? რომლის იდეა იყო, ბატონო პაატა?
წესს ყოველთვის აქვს გამონაკლისი და როგორც ჩანს, შეცდომა იმასაც მოსდის, ვინც არაფერს აკეთებს! რაც შეეხება თქვენი შეცდომების დათვლას და ჩამოთვლას, მობრძანდით “ალიაში” და არ დაგამადლით!
კომენტარები