საქართველოს პრეზიდენტმა სალომე ზურაბიშვილმა ევროსაბჭოში სიტყვით გამოსვლისას, რუსეთის დელეგაცია საქართველოში უკვე დაპატიჟა, თუმცა როგორც ირკვევა, ეს საკითხი საქართველოს ხელისუფლებასთან შეთანხმებული არ ყოფილა.
როგორც “2020NEWS“-თან “ქართული ოცნების“ დეპუტატი გურამ მაჭარაშვილი აცხადებს, ჩამოვა თუ არა საქართველოში რუსეთის დელეგაცია, რომელსაც სავარაუდოდ, რუსეთის საგარეო საქმეთა მინისტრი სერგეი ლავროვი უხელმძღვანელებს, ამ საკითხს ხალისუფლება საერთაშორისო პარტნიორებთან ერთად გადაწყვეტს.
გურამ მაჭარაშვილი: „საქართველო ევროსაბჭოს ქვეყანაა. ევროსაბჭოს წესდების შესაბამისად, მინისტერიალი საქართველოში უნდა ჩატრდეს. ჩვენ დასავლელ პარტნიორებთან ვმუშაობთ და ამ საკითხთან დაკავშირებით გადაწყვეტილებას ერთობლივად მივიღებთ.
მგონი, ეჭვი არავის ეპარება იმაში, რომ ჩვენი დასავლელი პარტნიორები არ მიიღებენ ისეთ გადაწყვეტილებას, რომელიც რუსული პროპაგანდის განვითარებას ხელს შეუწყობს.
– ბატონო გურამ, საქართველოს პრეზიდენტმა რუსეთის დელეგაცია საქართველოში ევროსაბჭოს საპარლამენტო ასამბლეაზე გამოსვლისას უკვე მოიწვია. ეს საკითხი ახლა უნდა შეათანხმოთ საერთაშორისო პარტნიორებთან?
– რა განაცხადა სალომე ზურაბიშვილმა, მის ადმინისტრაციას ჰკითხეთ. ხელისუფლების პოზიცია არის ის, რომ გადაწყვეტილებას ჩვენს პარტნიორებთან ერთად, ქვეყნის ინტერესებიდან გამომდინარე მივიღებთ, შესაბამისად, ყველა კითხვის ნიშანი მოიხსნება.
ამ საკითხზე სკანდალის ატეხვა არ შეიძლება. საერთოდ,“ნაციონალურ მოძრაობას“ ხმა როგორ აქვს ამოსაღები?! ამ პარტიამ 2008 წელს ხელი მოაწერა რეზოლუციას, რომლის მიხედვით, საქართველომ ომი დაიწყო.
– სერგეი ლავროვი, რომელმაც ოკუპაციის შესახებ კანონი არაერთხელ დარღვია, საქართველოში უნდა შემოვიდეს?
– მგონი, გასაგებად აღვნიშნე. მხოლოდ ლავროვის კი არა, პარტნიორებთან ერთად ყველა საკითხი იქნება განხილული. თქვენ როგორ ფიქრობთ, ქვეყნის ინეტერსებიდან გამომდინარე, არ უნდა მივიღოთ გადაწყვეტილება დასავლელ პარტნიორებთან ერთად?!
– რა თქმა უნდა. ამიტომ გეკითხებით, დაუჭერთ თუ არა მხარს საქართველოში ლავროვის ჩამოსვლას-თქო.
– ყველაზე მაღლა ჩვენი ქვეყნის ინტერესები დგას, ეს არის ჩვენი ხაზი. კიდევ ერთხელ ვამბობ, ამ საკითხთან დაკავშირებით საქართველოს ხელისუფლება გადაწყვეტილებას დასავლელ პარტნიორებთან ერთად მიიღებს.
კომენტარები