“ორი ადრე მოკლა, ორი ახლა მოკლა, რომ გამოვა კიდევ რომელ ოჯახს გაამწარებს?” – ადგილობრივები კონდოლში მოხდარ მკვლელობაში ბრალდებულზე

ფოტო – ტვ პირველი

კახეთში შვილის თანდასწრებით ცოლ-ქმრის მკვლელობაში ბრალდებული პოლიციამ 5 დღიანი ძებნის შემდეგ, ბათუმში დააკავა. 

გარდაცვლილთა ახლობლები დამნაშავის უმკაცრესი ზომით დასჯას მოითხოვენ. ერთ-ერთი ადგილობრივის თქმით, ორმაგ მკვლელობაში ბრალდებულს მსგავსი დანაშაული წარსულშიც აქვს ჩადებილი. 

“ორი ადრე მოკლა, ორი ახლა მოკლა, რომ გამოვა კიდევ რომელ ოჯახს გაამწარებს. აუცილებლად, უმკაცრესად უნდა დაისაჯოს,” –  ამბობს გარდაცვლილის ნათესავი “რუსთავი2”-თან.

შეგახსენებთ, მკვლელობა თელავის რაიონის სოფელ კონდოლში მოხდა. გამოძიებით დადგინდა, რომ ბრალდებულ მამაკაცს მიმდინარე წლის 10 თებერვალს, ფერმაში, ურთიერთშელაპარაკება მოუხდა ამავე ფერმაში დასაქმებულ ცოლ-ქმართან, მათ ფულს სთხოვდა, უარის მიღების შემდეგ კი ორივე სანადირო თოფიდან გასროლით მოკლა.

34 წლის მწყემსს 20 წლამდე ან უვადო თავისუფლების აღკვეთა ემუქრება.