„ერთიანი ნაციონალური მოძრაობა“ საპროტესტო აქციას 15:00 საათზე, რესპუბლიკის მოედანზე გამართავს.
საპროტესტო მსვლელობები დღეს სამ სხვადასხვა ლოკაციებზე უნდა გამართულიყო, თუმცა გეგმები მესამე პრეზიდენტის მდგომარეობის დამძიმების შემდეგ შეიცვალა.
„ხელისუფლება მზადაა, რომ დატყვევებული ადამიანი მოკლას. მოკლას არა საავადმყოფოში, არა ციხეში, არამედ იქ, სადაც მოისურვა ბიძინა ივანიშვილმა, ეს არ არის ციხე, ეს არის რაღაც შენობა. ივანიშვილმა არ შეისმინა ყველაზე გამოცდილი ექიმების კომპეტენტური რჩევები, დარიგებები, მათ მიერ გაკეთებული მძიმე პროგნოზები. აქედან გამომდინარე ქვეყნის ისტორიის ამ მნიშვნელოვან მომენტში საჭიროა სრული მობილიზაცია. ჩვენ ხვალისთვის 3 ლოკაციაზე დაგეგმილ მანიფესტაცია-მსვლელობას ვაუქმებთ და ხვალ ყველას, ვისაც სჯერა, რომ შიმშილობა შიმშილობაა, ვისაც სჯერა, რომ ამ ყველაფერში ჩართულია რუსეთის სპეცსამსახურები, ვისაც სჯერა, რომ ქვეყნის თავისუფლება და ღირსება არის ძალიან დიდი საფრთხის ქვეშ, გელოდებით 3 საათზე რესპუბლიკის მოედანზე“, – განაცხადა ნიკა მელიამ.
სააკაშვილის მდგომარეობა მას შემდეგ დამძიმდა, რაც მან ადვოკატების მონახულების შემდეგ გონება დაკარგა.
კომენტარები