მათე დევიძის განაჩენის გამოცხადების შემდეგ, თბილისის საქალაქო სასამართლოში, სავარაუდოდ, თაზო დათუნაშვილი დააკავეს.
ვიდეოკადრებში, რომელსაც “პუბლიკა” ავრცელებს, ჩანს, როგორ შეიყვანეს ის მანდატურებმა შენობაში ძალის გამოყენებით.
“ლელო – ძლიერი საქართველოს” ლიდერი, ფიქრია ჩიხლაძე “პირველებს” ეუბნება, რომ დათუნაშვილს, სავარაუდოდ, მანდატურები ფიზიკურად გაუსწორდნენ.
არსებული ინფორმაციით, პოლიტიკოსს დაზიანებები აღენიშნება. კოალიცია “ძლიერი საქართველო” ამ წუთებშიც ადგენს, სად ჰყავთ გადაყვანილი პოლიტიკოსი.
მე ვიმყოფებოდი ეკა მიშველაძის პროცესზე. უცბად ატყდა ხმაური, როდესაც მესიჯით გავიგეთ, რომ მათე დევიძის თაობაზე განაჩენი გამოტანილი იყო და მივხვდით, რომ ეს ხმაური ამ ამბავს უკავშირდებოდა. ჩვენ დარბაზში ვისხედით და ისმოდა ხმა, “ნუ მცემთ, ბიჭო, ნუ მცემთ, ბიჭო”. ეს ხმა თაზოს ხმას ჰგავდა. ახლა ვცდილობთ, გავარკვიოთ, ადამიანი სად არის, არის თუ არა დაკავებული. მას საბა ბუაძე ესაუბრა მანამ, სანამ ტელეფონს ჩამოართმევდნენ. ახლა ტელეფონი ჩამორთმეული აქვს, რადგან ვერ ვუკავშირდებით”. – განაცხადა ფიქრია ჩიხლაძემ.
საბა ბუაძე, წერს:
„თაზო დათუნაშვილი გაიტაცეს მანდატურებმა, ფიზიკურად გაუსწორდნენ და სასამართლოს სარდაფში საკანში ჰყავთ გამოკეტილი. ტელეფონი წაართვეს“.
კომენტარები