“ყველა ადამიანი, რომელიც დღეიდან მოკვდება, თქვენ გამო მოკვდება” – ზელენსკი ნატო-ს

უკრაინის პრეზიდენტმა, ვოლოდიმირ ზელენსკიმ უკრაინის საჰაერო სივრცეში არასაფრენი ზონის შემოღებაზე უარის თქმის გამო ნატო-ს წევრი ქვეყნების უარი გააკრიტიკა.

უკრაინული მედიის ცნობით, ამის შესახებ ქვეყნის პრეზიდენტმა ვიდეომიმართვისას განაცხადა.

„ნატო-ს ქვეყნების ყველა სადაზვერვო უწყებამ კარგად იცის მტრის გეგმები. მათ აგრეთვე დაადასტურეს, რომ რუსეთს შეტევის გაგრძელება სურს. როგორ შეიძლება? იმის გაგებით, რომ ახალი შეტევები და მსხვერპლი გარდაუვალია, ნატო-მ შეგნებულად გადაწყვიტა არ დაეხურა საჰაერო სივრცე უკრაინის თავზე. მიგვაჩნია, რომ ნატო-ს ქვეყნებმა თავად შექმნეს ნარატივი, თითქოსდა უკრაინის თავზე საჰაერო სივრცის დახურვა გამოიწვევს რუსეთის პირდაპირ აგრესიას ნატო-ს წინააღმდეგ. ეს არის თვითჰიპნოზი მათთვის, ვინც სუსტი, დაუცველი არის შინაგანად, მაგრამ ჩვენზე მრავალჯერ ძლიერ იარაღს ფლობს. თქვენ ადამიანებზე, ადამიანობაზე უნდა გეფიქრათ. იმ შეხვედრაზე რაზე ფიქრობდით? ყველა ადამიანი, ვინც ამ დღიდან დაიღუპება – თქვენ გამო დაიღუპება. თქვენი სისუსტის გამო, თქვენი განხეთქილების გამო. ალიანსმა დღეს რაც გააკეთა – საკუთარი შესყიდვების სისტემიდან 50 ტონა დიზელის საწვავის გადაცემა იყო უკრაინისთვის, ალბათ იმიტომ, რომ ბუდაპეშტის მემორანდუმის დაწვა შევძლოთ? უკეთესად დაიწვას? მაგრამ ის ჩვენთვის უკვე დაიწვა რუსული ჯარების ცეცხლში“, – განაცხადა ზელენსკიმ ვიდეომიმართვისას.

რა არის ბუდაპეშტის მემორანდუმი

სსრკ-ს დაშლის შემდეგ კიევმა დიდი ბირთვული არსენალი მიიღო მემკვიდრეობით. თუმცა,1994 წელს უკრაინამ, რუსეთმა, შეერთებულმა შტატებმა და ბრიტანეთმა ხელი მოაწერეს ბუდაპეშტის მემორანდუმს, რომლის თანახმადაც, უკრაინის ტერიტორიაზე ბირთვული არსენალი განადგურდა, ბირთვულმა სახელმწიფოებმა კი, კიევს უსაფრთხოების გარანტიები მისცეს.