თბილისის საქალაქო სასამართლოს მოსამართლე მანუჩარ ცაცუა განიხილავს ტელეწამყვან ნანუკა ჟორჟოლიანის ადმინისტრაციულ საქმეს. შსს მას ედავება 3 იანვარს აქციაზე გზის ხელოვნურად გადაკეტვას, მიზეზით, რომ ხალხის საკმარისი რაოდენობა არ იყო.
ნანუკა ჟორჟოლიანმა სხდომის დასაწყისში მოსამართლის აცილება მოითხოვა და მას ჰკითხა, იყო თუ არა 12 იანვარს რესტორან „ბაბილოში“ მოსამართლეთა კორპორაციულ შეკრებაზე, რადგან თუ იყო, შესაძლოა, მოსამართლეს „პირდაპირი წყენა და ბრაზი ჰქონდეს მის მიმართ“, გამომდინარე იქედან, რომ იმ დღეს აქციის მონაწილე იყო.
ესტონეთის მიერ დასანქცირებულმა მოსამართლე ცაცუამ კითხვას არ უპასუხა ისე განაცხადა, რომ აცილების შუამდგომლობა დაუსაბუთებელია.
ნანუკა ჟორჟოლიანმა პროცესზე განაცხადა:
„უპირველეს ყოვლისა, ვადასტურებ ჩემს პატივისცემას იმ უწყების მიმართ, რომელსაც თქვენ წარმოადგენთ. მე არ მჯერა იმის, რომ პოლიციელმა მითხრა, რომ ეს უკანონობაა და მე სხვაგვარად ვიმოქმედე.
ამ სასამართლოში მიდის პროცესები და ადამიანებს აჯარიმებენ, რომლებიც იქ საერთოდ არ ყოფილან, თავის თავს ვერ ცნობენ მასალაში და აჯარიმებენ ისეთებს, რომლებიც უკვე გადაკეტილზე მიდიან. აქედან გამომდინარე, ის მტკიცებულება, რომელიც თქვენ წარადგინეთ, არ მაძლევს საშუალებას, რომ მე თქვენთან დავაში შემოვიდე, ამ შემთხვევაში საშუალებას ვგულისხმობ, მორალურ მიზეზს არ მაძლევს, რადგან მე ვიცი, ადამიანები როგორ არაფრის გამო ჯარიმდებიან, არაფრის გამო მიდიან ციხეში და როგორ არაფრის გამო ისჯებიან. ამიტომ ვფიქრობ, ვიდეო, რომელიც საქმეშია შეიძლება, თქვენ საკმარისად ჩათვალოთ ადმინისტრაციული ჯარიმის დასაკისრებლად, ამიტომ დავზოგავ თქვენს დროს, მოსამართლის დროს, მიუხედავად იმისა, რომ არ მჯერა, რომ პატრულმა სამართალდარღვევისკენ მიმითითა და არ დავემორჩილე… მიუხედავად ამისა, გეუბნებით, ის ვიდეო, რომელიც წარადგინეთ საკმარისია, ჩაითვალოს, რომ გზა გადავკეტე. ამიტომ თუ სასამართლო დამაჯარიმებს, მე ვიღებ ამ ჯარიმას, როგორც იმ ჯარიმას, რომელიც უნდა გადავიხადო. აქვე განვმარტავ, ხვალ და ზეგ მე მაინც წავალ რუსთაველის გამზირზე. გეთანხმებით, განზრახვა იყო გზის გადაკეტვა. იქნება ხვალ, იქნება ზეგ, იქნება მანამდე, ვიდრე პოლიტიკურ და სინდისის პატიმრებს გარეთ არ გამოუშვებენ“.
ნანუკა ჟორჟოლიანის მიმართ ადმინისტრაციული სამართალწარმოება მიმდინარეობს ადმინისტრაციული კოდექსის 174-ე პრიმა მუხლით, რომელიც შეკრების და მანიფესტაციების წესის დარღვევას გულისხმობს და 5000-ლარიან ჯარიმას ან ადმინისტრაციულ პატიმრობას ითვალისწინებს.
აღნიშნულ სამართალდარღვევაზე სანქცია ,,ქართულმა ოცნებამ” ნოემბერ-დეკემბრის აქციების შემდეგ გაამკაცრა – კანონპროექტი დაჩქარებულად, სამ დღეში მიიღეს, მიხეილ ყაველაშვილმა კი მას ხელი ინაუგურაციის დღესვე მოაწერა.
კომენტარები