პროკურორ გიორგი მუჯირის თქმით, დღევანდელ სასამართლო პროცესზე, ექსპრეზიდენტმა თავადვე დაადასტურა, რომ ბიუჯეტის თანხებს პირადი და გარშემომყოფების კეთილდღეობისთვის ხარჯავდა.
სააკაშვილის განცხადება ბრალდების მხარისთვის მნიშვნელოვანი იყო იმდენად, რამდენადაც ამ განცხადებაში მოვისმინეთ ბრალდებულის აღიარება, რომ სპა-პროცედურებს თუ ფუფუნების საგნებს ნამდვილად თვითონ მოიხმარდა, შვილის სწავლის საფასურის დაფინანსებაც სწორედ მისი გადაწყვეტილი იყო და ამის ახსნა იყო მხოლოდ ერთი სიტყვა, რომ ეკუთვნოდა. რეალურად კი, სამართლებრივ საფუძველი ამ დანახარჯს არ გააჩნდა.
მიხეილ სააკაშვილის განცხადებაში ჩვენ მოვისმინეთ უამრავი ტყუილი, პირობითად, ტაილანდში დასვენება, სადაც ერთი სასტუმროს ნომერი 2 დღის განმავლობაში დაჯდა 60 000 ლარი, თითქოსდა ემსახურებოდა რაიმე სახელმწიფო ინტერესს. ჩვენ გვაქვს წარმოდგენილი განკარგულება, რომელსაც თავად მიხეილ სააკაშვილი აწერს ხელს, სადაც მითითებულია, რომ უნდა გადახდილიყო მიხეილ სააკაშვილის VIP მიმსახურება, რაც განხორციელდა და არც ერთი დოკუმენტი მოიპოვება იმის თაობაზე, რომელიც მიუთითებდა ამ ვიზიტისას რაიმე სახელმწიფო მნიშვნელობაზე. მოლოდინი გვაქვს, რომ მსგავს ტყუილს ძალიან ბევრჯერ მოვისმენთ, პირობითად, ლას-ვეგასში დასვენებაზე მას შეუძლია, ფანტაზიის სრული სპექტრი მოიშველიოს და დაასახელოს ნებისმიერი პიროვნება მსოფლიოს მასშტაბით, რომ, თითქოს, ამ პერიოდში შეხვდა – ამბობს პროკურორი.
ცნობისთვის, მიხეილ სააკაშვილს საქართველოს პრეზიდენტის პოსტზე ყოფნის პერიოდში 9 მილიონი ლარის გაფლანგვას ედავებიან.
კომენტარები