თელავის პირველ საჯარო სკოლაში მოსწავლეზე შესაძლო ძალადობაში დადანაშაულებული მასწავლებელი სამსახურიდან გაათავისუფლეს.
სკოლის დისციპლინური კომიტეტის რეკომენდაციის საფუძველზე, შესაბამის ინდივიდუალურ-სამართლებრივი აქტს პედაგოგის სამსახურიდან დათხოვნის შესახებ დირექტორმა, მაია ოთარაშვილმა ხელი ამ საღამოს მოაწერა.
შესაძლო ძალადობა მეექვსე კლასის მოსწავლეზე, პირველ საჯარო სკოლაში, 22 იანვარს, საგაკვეთილო პროცესზე მოხდა, რაც სათვალთვალო ვიდეო-კამერამაც დააფიქსირა.
ფაქტის შესახებ, სკოლის დირექტორის წარდგინების საფუძველზე, დისციპლინურ კომიტეტი, დაახლოებით, ერთი თვის განმავლობაში მსჯელობდა.
ინციდენტიდან ორი კვირის შემდეგ, სამართალდამცავ ორგანოებს მიმართა მოსწავლის მამამ, რომელიც ამავდროულად, მანდატურის სამსახურის თელავის კოორდინატორია.
გამოძიება საქმეზე სისხლის სამართლის კოდექსის 126-ე მუხლით მიმდინარეობს.
კომენტარები