მოლდოვაში დაიხურება ხუთი ტელეარხი, რომლებსაც, მთავრობის ინფორმაციით, ქვეყნიდან გაქცეული ოლიგარქები ილან შორი და ვლადიმირ პლახოტნიუკი აფინანსებდნენ. ამის შესახებ ადგილობრივი მედია „მოლდოვის ეროვნული მნიშვნელობის საინვესტიციო პროექტების განვითარების საბჭოს“ გადაწყვეტილებაზე დაყრდნობით იუწყება.
კერძოდ, საბჭომ ჩამოართვა მაუწყებლობის ლიცენზია სამ კომპანიას, რომლებსაც ეკუთვნით ტელეარხები Primul în Moldova, Accent TV, Orizont TV, Canal 2 და Canal 3.
მოლდოვის მთავრობის ინფორმაციით, კომპანიებმა დაარღვიეს საბჭოს მოთხოვნები და წარადგინეს არასრულყოფილი ინფორმაცია დაფინანსების შესახებ. კერძოდ, კომპანიებმა მხოლოდ ერთი საბანკო ანგარიშის მონაცემები წარადგინეს, მაშინ, როდესაც მათ ანგარიშები სხვა ბანკებშიც ჰქონდათ.
“დაფიქსირებულია ტრანზაქციები, რომლებიც ადასტურებს, რომ კომპანიები პლახოტნიუკისა და შორის დაჯგუფებას უკავშირდება“, – აღნიშნავენ მოლდოვის მთავრობაში.
გაქცეულ ოლიგარქს, ილან შორის, მოლდოვაში15 წლიანი პატიმრობა დაუსწრებლად აქვს მისჯილი.მოლდოვის საგამოძიებო ორგანოებმა დაადგინეს, რომ შორი 2014 წელს მოლდოვის საბანკო სისტემიდან მილიარდი დოლარის მოპარვის ერთ-ერთი მთავარი მონაწილე და ბენეფიციარი იყო. ის ერთ-ერთი პრორუსული ოპოზიციური პარტიის ლიდერი იყო, თუმცა მისი პარტია მოლდოვის საკონსტიტუციო სასამართლომ ქვეყანაში დესტაბილიზაციის მოწყობის მცდელობისთვის კრძალა. რამდენიმე დღის წინ ცნობილი გახდა, რომ მოლდოვამ რუსეთისგან შორის ექსტრადირება მოითხოვა.
ვლადიმერ პლახატნიუკი „მოლდოვის დემოკრატიული პარტიის” თავმჯდომარე, მანამდე კი ქვეყნის 3 მოწვევის პარლამენტის წევრი, ასევე პარლამენტის პირველი ვიცე-პრეზიდენტი იყო. 2019 წლამდე, ანუ იქამდე, ვიდრე ქვეყნის სათავეში მაია სანდუს პროდასავლური გუნდი მოვიდოდა, პლახატნიუკი აკონტროლებდა როგორც მთავრობას, ისე საპარლამენტო უმრავლესობას. ის მოლდოვის ყველაზე მდიდარ ადამიანად ითვლება. ხელისუფლების შეცვლის შემდეგ კი ოლიგარქმა მოლდოვა დატოვა და ამჟამად თურქეთში ცხოვრობს. ის აშშ-ისა და ევროკავშირის მიერაა სანქცირებული.
კომენტარები