“მმართველ პარტიასთან ერთად სწორედ ასეთი ბიზნეს ელიტაა ამ ქვეყნის თავზე დატეხილი უბედურებების თანაპასუხისმგებელი” – ირაკლი მელაშვილი

გუშინ,7 მაისს მაისს, მეორე მსოფლიო ომის დასრულების 80 წლისთავზე, გერმანულმა გაზეთებმა Die Zeit, Süddeutsche Zeitung და Frankfurter Allgemeine Zeitung გამოაქვეყნეს 49 დიდი გერმანული კონცერნის ერთობლივი წერილი, რომელშიც მათ აიღეს პასუხისმგებლობა ნაციონალ-სოციალისტების ძალაუფლების განმტკიცებაზე მეოცე საუკუნის 30-იან 40-იან წლებში. „1933 წელს და მის შემდეგ ძალიან ბევრი დუმდა, ზურგი აქცია და ხმა არ ამოიღო. სწორედ აქედან მოდის ჩვენი პასუხისმგებლობა – წარსულის, აწმყოსა და მომავლის მიმართ“, – ნათქვამია კომპანიების განცხადებაში. ამ დოკუმენტს ხელს აწერენ Adidas, Bayer, BASF, Bosch, BMW, Commerzbank, Deutsche Bahn, DHL, Hugo Boss, Mercedes-Benz, Lufthansa, Rheinmetall, Siemens, Volkswagen და ბევრი სხვა ცნობილი გერმანული კომპანია.

სჯობს გვიან, ვიდრე არასდროს, ბიზნეს ელიტას ყოველთვის განსაკუთრებული პასუხისმგებლობა გააჩნია ქვეყნის ბედზე. მე მაინტერესებს ოდესმე ქართულ ბიზნესს თუ მოუვა თავში შეაფასოს საკუთარი როლი დამოუკიდებლობის აღდგენის დღიდან მოყოლებული ქვეყენაში მიმდინარე პროცესებში? კი ბატონო, ძალიან შორს ვარ იმ აზრისგან, რომ რომელიმე ქართული ხალისუფლება ჰიტლერის ფაშისტურ რეჟიმს შევადარო, მაგრამ ასე უკიდურესობა და ქვეყნის საშინელი მარცხია აუცილებელი იმისთვის, რომ ელიტებმა იგრძნონ საკუთარი პასუხისმგებლობა საზოგადოების და სახელწმიფოს წინაშე? რაც გვჭირს, ეს მხოლოდ ხელისუფლებების ბრალი?

მოდი, გადავხედოთ რა ხდებოდა ამ ქვეყანაში 35 წლის მანძილზე. შევარდნაძის მმართველობის დროს ნულოვანი აუქციონებით ხელში ჩაგდებული ქონების „ჭკვიანური მართვის“ შედეგად ქვეყნის ეკონომიკური პოტენციალის სრულად განადგურება მხოლოდ მაშინდელი კორუმპირებული ჩინოვნიკების დანაშაულია? ის რომ, ქვეყნის მაშინდელმა ბიზნეს ელიტამ, პრაქტიკულად უკლებლივ ყველა საწარმოს მანქანა დანადგარები საზღვარგარეთ ჩალის ფასად გაყიდა და არნახული სისწრაფით ქვეყნის სრული დეინდუსტრიალიზაცია მოახდინა, ამაში მხოლოდ ჩინოვნიკები და მთავრობა იყო დამნაშავე? საქართველოში უკლებლივ ყველა ხელისუფლება მასობრივად რომ არღვევდა და არღვევს ადამიანის უფლებებს, წამებები, ქონების ჩამორთმევები, ადამიანების უკანონოდ დაპატიმრებები და ა.შ. ეს საქართველოში არ ხდებოდა და საუბედუროდ, ბევრი რამ, დღესაც არ გრძელდება? ამ ყველაფრის ერთერთი მიზეზი ქართული ბიზნეს ელიტის ტოტალური უპრინციპობა და სამაქალაქო პოზიციის დეფიციტიც ხომ არ არის? ქვეყნის ყველაზე შეძლებული ფენა მხოლოდ საკუთარ სიმდიდრის შენარჩუნების მოტივით, მუდმივად თავს ხომ არ არიდებს ქვეყანაში მიმდინარე ნეგატიურ სოციალურ-პოლიტიკურ პროცესებზე საკუთარი პოზიციის დაფიქსირებას? ჩვენი ბიზნესმენების ასეთი კონფორმიზმის მნიშვნელოვანი წილიც ხომ არ არის იმაში, რომ საქართველოს ყველა ხელისუფლება გვექცა მონსტრად, რომელიც საკუთარ მოქალაქეს ჩაგრავს? თუ ეს ყველაფერი მარტო იმ ხალხის ბრალია, ვინც არჩევნებზე 30 ლარად ყიდის ხმას და არა იმ ეკონომიკური ელიტის, რომელიც საქართველოში ნებისმიერ ხელისუფლებასთან შეხმატკბილებულლი თანამშრომლობით ხელს უწყობდა მათ, დაემონებინა და სოციალურად თუ პოლიტიკურად დაეჩაგრათ მოსახლეობა?

შეიძლება ეს პოსტი ბევრს ზედმეტად რადიკალურად ეჩვენოს. მაგრამ ეს და მსგავსი კითხვები ჩვენს საზოგადოებაში მრავლად არსებობს და მას პასუხის გაცემა უნდა. ახლა, მარტო ჩვენ ვხედავთ როგორ იდეალისტურად და დაუზარელად იბრძვის ამ ქვეყნის მომავლისთვის ჩვენი შვილების და შვილიშვილების თაობა? მზია ამაღლობელი (დღეს დაბადების დღე ციხეში მყოფს, აქედან რომ უნდა მივულოცო) ანდრო ჭიჭინაძე და ორმოცდათამდე პოლიტპატიმარი თქვენი საფიქრალი არ არის? მარტო ამ ბავშვების საფიქრალია , რომ ქვეყანა აშკარად გზაგასაყარზეა, რომ დავიტოვებთ შანსს განვვითარდეთ როგორც თავისუფალი, დემოკრატიული საზოგადოება, თუ ჩავეფლობით ავტორიტარულ, ავტარქიულ მმართველობის ჭოაბში? ვინმეს ჰგონია არ ჩანს საქართველოში მიმდინარე პროცესების მიმართ ქართული ბიზნეს ელიტის უმრავლესობის აბსოლუტურად ინდეფერენტულ დამოკიდებულება? თავისუფალი სასამართლო, სიტყვის და მედიის თავსუფლება, სახელმწიფო ჩინოვნიკების მხრიდან ძალაუფლების გადამეტებისა და კორუფციის წინააღმდეგ ბრძოლა, ანუ რისთვისაც დღეს საზოგადოების მნიშვნელოვანი ნაწილი და ქუჩაში გამოსული ახალგაზრდობა იბრძვის, თქვენ და თქვენს ოჯახებს არ გჭირდებათ, თუნდაც საკუთარი უსაფრთზოებისათვის, საკუთარი ქონებების და ბიზნეს ინტერესების დასაცავად? თუ ეს სხვების საბრძოლია და საქართველოზე ზრუნვა ყველას საქმეა, ყველას თავის ტკივილია, გარდა იმ ადამიანებისა, რომლებსაც ამ ქვეყანაში ბიზნეს ელიტა გქვიათ?

ჰოდა კიდევ ვკითხულობთ რატომ ვართ ამ დღეში? ძალიან დიდი ეჭვი მიჩნდება, რომ ამ ოცდათხუთმეტი წლის მანძილზე ყველა მმართველ პარტიასთან ერთად სწორედ ასეთი ბიზნეს ელიტა არის ამ ქვეყნის თავზე დატეხილი უბედურებების თანაპასუხისმგებელი. „ძალიან ბევრი დუმდა, ზურგი აქცია და ხმა არ ამოიღო. სწორედ აქედან მოდის ჩვენი პასუხისმგებლობა – წარსულის, აწმყოსა და მომავლის მიმართ“ – ჩემი აზრით, ეს სიტყვები მარტო გერმანულ ბიზნესს არ ეკუთვნის, ეს ჩვენი ბიზნეს ელიტის უახლოეს წარსულსაც და დღევანდელობასაც ზუსტად ასახავს .