მიანმარში, სმიტსონის ჯანდაცვის გლობალური პროგრამის მკვლევრებმა ღამურებში ექვსი ახალი კორონავირუსი აღმოაჩინეს. ეს გახლავთ პირველი შემთხვევა, როდესაც ეს ვირუსები მსოფლიოში სადმე დააფიქსირეს. სხვა სახეობებზე გადადების შესაძლებლობას და შესაბამისად, რისკებს ადამიანთა ჯანმრთელობისადმი, სამომავლო კვლევები შეაფასებს. კვლევის ავტორთა განცხადებით, ახლად აღმოჩენილი კორონავირუსები დაკავშირებული არ არის მწვავე რესპირატორული სინდრომის (SARS CoV-1), ახლო აღმოსავლეთის რესპირატორული სინდრომის (MERS) და COVID-19-ის (SARS-CoV-2) გამომწვევ კორონავირუსებთან.
კვლევა ჟურნალ PLOS ONE-ში გამოქვეყნდა და სამეცნიერო საზოგადოებას დაეხმარება ღამურებში არსებული კორონავირუსების მრავალფეროვნების შესწავლაში, გამოვლენასა და საზოგადოებრივი ჯანდაცვისთვის საშიში ინფექციური დაავადებების პრევენციაში; ეს კი განსაკუთრებით მნიშვნელოვანია ახლა, როდესაც COVID-19-ის პანდემია მიმდინარეობს.
ახალი ვირუსები მეცნიერებმა მაშინ დააფიქსირეს, როდესაც პროექტ PREDICT-ის ფარგლებში ცხოველებისა და ადამიანების ბიომთვალყურეობას ახორციელებდნენ, რათა უკეთ შეესწავლათ დაავადების ცხოველიდან ადამიანზე გადასვლის გარემოებები.
ჯგუფი კვლევებს ძირითადად აწარმოებს მიანმარის ისეთ ადგილებში, სადაც მიწათსარგებლობითა და განვითარებით გამოწვეული ცვლილებების გამო ადამიანებს ადგილობრივ ველურ ბუნებასთან უფრო ახლო კონტაქტი აქვთ. 2016-2018 წლებში ასეთ ზონებში მათ ღამურების ნერწყვისა და ფეკალიების 750-ზე მეტი ნიმუში შეაგროვეს. ექსპერტები ვარაუდობენ, რომ ღამურებში წარმოდგენილია ათასობით კორონავირუსი, რომელთა უმრავლესობაც ჯერ აღმოჩენილი არ არის.
მას შემდეგ, რაც მეცნიერებმა ნიმუშები გატესტეს და უკვე ცნობილ კორონავირუსებს შეადარეს, პირველად ისტორიაში, გამოავლინეს ექვსი ახალი, აქამდე უცნობი კორონავირუსი. მათ ასევე დააფიქსირეს კორონავირუსი, რომელიც სამხრეთ-აღმოსავლეთ აზიაში ყველგან გვხვდება, მაგრამ მიანმარში ამ დრომდე არ იყო აღმოჩენილი.
კორონავირუსები ადამიანებში მრავალ სხვადასხვა დაავადებას იწვევენ, მათ შორის იყო SARS-ი, MERS-ი და ამჟამინდელი გლობალური პანდემია COVID-19. კვლევის ავტორთა განცხადებით, ახლად აღმოჩენილი კორონავირუსები არ გახლავთ SARS CoV-1-ის, MERS-ის ან SARS-CoV-2-ის ახლო ნათესავები. სხვა ცხოველებსა და ადამიანებში გადასვლის პოტენციალის შესაფასებლად, საჭიროა დამატებითი კვლევები.
კვლევა ჟურნალ PLOS ONE-ში გამოქვეყნდა.
მომზადებულია 1TV-ს მიერს phys.org-ის მიხედვით
კომენტარები