“მე მგონია… არ მახსოვს… ჩემი აზრით…” – რას ამბობს შს მინისტრი ბაჩალიაშვილის საქმის ახალ დეტალებზე?

შინაგან საქმეთა მინისტრმა, ვახტანგ გომელაურმა უპასუხა თამარ ბაჩალიაშვილის საქმის გამომძიებლის, სერგო შუბითიძის სკანდალურ განცხადებას, რომლის მიხედვითაც, შუბითიძე ამტკიცებს, რომ გამოძიების დროს  ბაჩალიაშვილის მობილური ტელეფონი დარღვევით ამოიღეს შემთხვევის ადგილიდან და მისი დალუქვაც უკანონოდ მოხდა.

გომელაურმა თქვა, მართალია თქვა, რომ ყველაფერი კანონიერად გაკეთდა, მაგრამ იქვე თქვა, ინფორმაცია არასწორია თუ არა, ზუსტად არ იცის და ეს მისი აზრია. გარდა ამისა, თქვა, რომ ფაქტები გადასცა თუ არა შსს–მ პროკურატურას, არ ახსოვს.

“მე მგონია, რომ ეს არასწორი ინფორმაციაა, იმიტომ, რომ ყველაფერი კანონიერად გაკეთდა. იქვე დაილუქა ყველა ტელეფონი, იქვე. გადაღებულია ეს, უწყვეტი კადრებით ვიღებდით, ჩვენი საექსპერტო სამსახური, გადაღებულია, ფაქტები გვაქვს და პროკურატურას გადავცემთ, თუ უკვე გადავეცით არ მახსოვს. ყველა ადგილზე ამოღებული, მისი ტელეფონიც, ყველაფერი ადგილზე დაილუქა კამერების წინ. ისე, რომ საიდან მოიტანა მაგან, რომ ტელეფონი გახსნეს და დალუქეს, ეს არის ჩემი აზრით ტყუილი”,- თქვა ვახტანგ გომელაურმა.

შეგახსენებთ, 29 აპრილს, თამარ ბაჩალიაშვილის საქმის ერთ-ერთმა ყოფილმა გამომძიებელმა საქმეზე ტელეკომპანია “ფორმულას” ვრცელი ინტერვიუ მისცა. სერგო შუბითიძის თქმით, მას არ სჯერა გამოძიების ვერსიის, რომ ბაჩალიაშვილმა თავი მოიკლა და ამბობს, რომ საქმეზე მტკიცებულებები გაყალბებულია.  შუბითიძემ თქვა, რომ გამოძიების დროს  ბაჩალიაშვილის მობილური ტელეფონი დარღვევით ამოიღეს შემთხვევის ადგილიდან და მისი დალუქვაც უკანონოდ მოხდა. მან გამოთქვა ვარაუდი, რომ ვიღაცამ ის გაასუფთავა.

სატელევიზიო ინტერვიუს საფუძველზე პროკურატურამ ბაჩალიაშვილის საქმეზე მტკიცებულებათა შესაძლო ფალსიფიკაციის ფაქტზე გამოძიება დაიწყო. სერგო შუბითიძე სასამართლოში მაგისტრი მოსამართლის წინაშე 2 მაისს გამოიკითხა.

ამასთან, ბაჩალიაშვილის ოჯახის ადვოკატები გამოძიების თავიდან ჩატარებას ითხოვენ. მათ 3 მაისს უწყებას საქმის ხელახალი გამოძიების მოთხოვნით მიმართეს.