„მე გეტყვით, „ოცნების“ ჩინოვნიკების მიერ მოპარული ფულით როგორ უნდა გავისტუმროთ საშვილიშვილოდ დაგროვილი საგრეო ვალები!“ – დავით ჭიჭინაძე

ლევან ჯავახიშვილი

„ალიას“ ესაუბრება პოლიტიკური მოძრაობა „ტრიბუნას“ დამფუძნებელი, დავით ჭიჭინაძე.

– წინასწარ ბოდიშს გიხდით და ირაკლი კობახიძის მორიგ, მართლაც სულელურ განცხადებაზე მინდა გთხოვოთ კომენტარი. ევროკავშირს ულტიმატუმი წაუყენა კობახიძემ – დეკემბერში თუ მოგვცემთ ევროკანდიდატის სტატუსს, მაშინ ერთ თვეში მივიღებთ საკონსტიტუციო ცვლილებებს და 2024 წლის არჩევნებს პროპორციული სისტემითა და დაბალი, 2%-იანი ბარიერით ჩავატარებთო. გამოვიდა, რომ სტატუსს თუ არ მოგცემენ, ძველი სისტემით ჩატარდება არჩევნებიო. ეს სისულელე რამ ათქმევინა?

– ეს ზუსტად ის ნათქვამია, რომ არაფერი გვინდა თქვენგანო, ევროკავშირს უთხრეს. უნდათ, რომ აქცენტები სხვა საკითხებზე გადაიტანონ, არ ილაპარაკონ იმ 12 პუნქტის შესრულებაზე, რომელსაც ევროკავშირი ჩვენთან ითხოვს. დეოლიგარქიზაციის, დეპოლარიზაციის, სამართლიანი სასამართლოს და მართლმსაჯულების სისტემის დეპოლიტიზაციის გამკეთებლები ესენი არ არიან. აქედან გამომდინარე, მათთვის მთავარია, როგორმე ეს სტატუსი მიიღონ, იქნებ ხალხი დროებით გააჩერონ. არჩევნები კი 2%-იანი იქნება თუ 1%-იანი, აზრი არ აქვს, მაინც გააყალბებენ, რაც უნდათ, ბოლოს მაინც იმ შედეგებს დაწერენ. ამ ფორმატით, ამ სისტემით არჩევნების ჩატარება არ შეიძლება. ახლა ჩვენ ვამზადებთ საკანონმდებლო ცვლილებებს, რომ დისტანციური ელექტრონული არჩევნები ჩატარდეს, შერეული ტიპის არჩევნები. ვისაც უნდა, საარჩევნო უბნებზე მივიდეს და მისცეს ხმა, ვისაც უნდა, დისტანციურად მისცეს ხმა და ეს უპირველესად, ჩვენს ემიგრანტებს ეხებათ და იმ ხალხს, ვინც სხვა და სხვა მიზეზით არჩევნების დროს ქვეყანაში  არ იქნება.

– ელექტრონულ არჩევნებს ვერ გააყალბებენ?

– სათანადო კონტროლის ქვეშ, ვერაფერს გააყალბებენ. ელექტრონული არჩევნები აუცილებლად უნდა დაინერგოს ქვეყანაში. მთავარია, ემიგრანტები მიიღებენ არჩევნებში მონაწილეობას. იმ უკმაყოფილო ხალხის წინაშე, ვისაც ამ ქვეყნიდან ერეკებიან, მოუწევთ ანგარიშის ჩაბარება. ემიგრანტები ყველაზე კარგად ხედავენ, დღეს რა ხდება ჩვენს ქვეყანაში. ერთი, რომ აქაც იყვნენ, ყველაფერი იწვნიეს ამ ქვეყნისა და ახლა უცხოეთში არიან და იქიდან ხედავენ განსხვავებას ჩვენსა და  განვითარებულ, ცივილიზებულ ქვეყნებს შორის. ემიგრანტების გზავნილებზე ვცხოვრობთ, ქვეყანას ინახავენ ეკონომიურად და აბსოლუტური უფლება აქვთ, ქვეყნის პოლიტიკურ ცხოვრებაში მიიღონ სრულფასოვანი მონაწილეობა და არ იყვნენ გარიყულები. არჩევნების ეს ფორმა ხელს  შეუწყობს მათ ამ საქმეში.

– „ქართული ოცნების“ ეს ზღვარგადასული, გამწარებული ლანძღვა ევროპისა და ამერიკისა, ვფიქრობ, იმის მანიშნებელიც არის, რომ ბიძინა ივანიშვილისა და ხელისუფლების სხვა წარმომადგენლების დასანქცირებამდე ბევრი დრო აღარ დარჩა. უკაცრავად და, იმიტომ არის, შარვლებიდან რომ ხტებიან ევროპა-ამერიკის ხსენებაზე ლამის კრუნჩხვები ემართებათ. ადრე ასე მწარედ  და ხელაღებით ხომ არ ილანძღებოდნენ?

– რა თქმა უნდა, ასეა. სანქციები როდესაც ამოქმედდება, ეს ყველაფერი როდესაც გამოქვეყნდება, მერე ფარული გახდება ხილული. ჩვენ დავინახავთ ამათ მიერ მოპარულ და სხვა უკანონო გზით ნაშოვნ ფულებს, რომლებიც უცხოურ ბანკებში აქვთ დაბინავებული. იმ ქონებას, რომლებიც უცხოეთში აქვთ. მერე ძალიან ბევრ ადამიანს გაუჩნდება ლეგიტიმური კითხვა: იმ ხელფასებით და თუნდაც პრემია-დანამატებით, როგორ დააგროვეს ამხელა ქონება და ფული? სანქციების მერე, რის გამოც გაყიდეს ამ ქვეყნის ინტერესები, ის დაუყადაღდებათ, ის ჩამოერთმევათ. ეს იქნება მართლა სამართლებრივი გადაწყვეტილება. მერე, შემდეგმა მთავრობებმა, უნდა მიმართონ ევროპის ქვეყნებს, ამერიკას და სხვა ქვეყნებსაც, სადაც ამათ ქონებას და ფულს დაუყადაღებენ, ეს ქონება ფულად აქციონ, ბანკებში დაყადაღებულ თანხებს მიუმატონ და იმ ქვეყნებმა ჩამოგვაწერონ საგარეო ვალები, ამ ფულში გაგვიქვითონ, ვისგანაც აღებული გვაქვს. საამისო მექანიზმი აუცილებლად მოიძებნება. ეს იქნება საუკეთესო გამოსავალი, რომ ამათი ნაქურდალი ქართულ სახელწიფოს მოხმარდეს.