გარდაცვლილი დათუნა ბერიძის ოჯახი ყველას დასჯას ითხოვს, ვინც 24 წლის ბიჭის სიკვდილზეა პასუხისმგებელი. ახალგაზრდა კაცის სიცოცხლე სატვირთო ამწეს ქვეშ დასრულდა. დათუნა ბერიძე დენის დარტყმის შედეგად გარდაიცვალა.
ტერიტორია, სადაც უბედური შემთხვევა მოხდა, რუსთავის აზოტის საწარმოს ეკუთვნის. ნეიტრალურ ადგილას, 500-მდე კვადრატულ მეტრზე საწარმოს ვაგონების ჩიხი აქვს განთავსებული. დათუნა ბერიძე ქობულეთიდან იყო. 24 წლის ბიჭი ამწეს მძღოლად იყო დასაქმებული. სატვირთო კერძო პირს ეკუთვნოდა და ახალგაზრდა მის სამართავად საჭიროების შემთხვევაში ქირაობდა.
უბედური შემთხვევის დღეს მამამ დათუნა ბერიძე ადგილზე დატოვა, 3 საათში კი დაურეკეს და უთხრეს, რომ შვილს დენმა დაარტყა და გარდაიცვალა. ირკვევა, რომ ახალგაზრდას მუშაობის პროცესში ამწე გაუფუჭდა და მის შეკეთებას ცდილობდა, ამ დროს ქარმა ამწეს ისარი მაღალი ძაბვის სადენებისკენ გადაისროლა და ახალგაზრდა ადგილზე დენის დარტყმის შედეგად გარდაიცვალა.
ოჯახი ამბობს, რომ უსაფრთხოების ნორმები იყო დარღვეული და იქ მანქანით მუშაობა არ შეიძლებოდა, თუმცა, უსაფრთხოების სამსახურს რეაგირება არ ჰქონდა.
დათუნას დედა ამბობს, რომ საწარმომ არც კი მიუსამძიმრა.
”აქ ოთხი საათი იწვა ჩემი შვილი, არავინ მოვიდა, არავინ უშველა… რა შვილი მომიკლეს, ხალხო, თქვენ არ იცით, მაზუთიანი ხელებით წავიდა იმ ქვეყნად…2 წლის გოგო დატოვა, დარბის მამას ეძებს. გზად მიდიოდაო, გზად კი არ მიდიოდა, აქ მუშაობდა. თვითონ ათასლარიანია მანქანის პატრონი, ორ მანქანას ამუშავებს. ჩემი შვილი გაწირა, აქეთ, ელექტროხაზებთან დააყენა და თვითონ იქეთ მუშაობდა. ჩემს შვილს “კლუჩი” გულზე დადებული და აქ ეგდო მკვდარი… “- ამბობს დედა ტვ პირველთან.
დათუნას მამა:
დამირეკა, მამა ბოლოღა დამრჩაო, ამააობაში გამსკდარა შლანგი… აქ ეგდო, მანქანის ქვეშ. აქ მანქანა არ უნდა მდგარიყო, ცოტა მოშორებით რომ ყოფილიყო, იქ არაფერია.
საწარმოს წარმომადგენელი გარდაცვლილ, 24 წლის ბიჭს აბრალებს მისივე სიკვდილს და ამბობს რომ უსაფრთხოების სამსახური არ იყო ადგილზე. ეს უარესია, რადგან ნიშნავს, რომ სამუშაო პროცესი მინიმუმ რიგ შემთხვევებში სრულიად არ კონტროლდება. ამბობს, რომ ადგილზე არ უნდა ყოფილიყო, თუმცა, ეგაც საწარმოს საწინააღმდეგოდ მოქმედებს, რადგან თუ პირი არ უნდა ყოფილიყო ადგილზე, რატომ არ დაატოვებინეს ტერიტორია?
თვითონ, კრანის ოპერატორი, უნდა წასულიყო და სხვაგან ერემონტებინა. უსაფრთხოების სამსახური გვყავს, მაგრამ არ იყო ადგილზე. არც მე ვიყავი იმ წამს ადგილზე, – ამბობს საწარმოს წარმომადგენელი.
მანქანის მეპატრონე, რომელიც ასევე საწარმოში მუშაობს, ამბობს, რომ უსაფრთხოების სამსახურს არასოდეს უთქვამს, რომ იმ ადგილას არ ემუშავათ:
მანდ ბევრჯერ გვიმუშავია, უსაფრთხოების სამსახურს რომ დაეშალა, ხომ არ დავდგებოდით იქ სამუშაოდ.
კომენტარები