"მართალია ივანიშვილი... უმადურმა პოლიციელებმა მაინც სისტემიდან გაქცევა დაიწყეს"

2,465

ყოფილი მაღალჩინოსანი, პარტია “საქართველოსთვის” პოლიტსაბჭოს წევრი, ნათია მეზვრიშვილი, ე.წ. ოცნებიდან გასული დეპუტატების დღევანდელ განცხადებას ეხმაურება და წერს:

“მართალია ბატონი ივანიშვილი. ჩავდექით რა დასავლეთის სამსახურში, განვიზრახეთ პოლიციის მოშლა. ამ მიზნით:

სასწრაფოდ დავიწყერთ საგამოძიებო სისტემის ფუნდამენტური რეფორმა გამოძიების ხარისხის ასამაღლებლად და გამომძიებლის ღირსებისთვის, რომ გამომძიებელი პროკურორის კურიერი არ ყოფილიყო;

სასწრაფოდ გავზარდეთ პოლიციელების ხელფასები, რათა პოლიცია სათანადოდ დაფასებულიყო;

სასწრაფოდ დავიწყეთ საპოლიციო ინფრასტრუქტურის განახლება, რათა პოლიციელებს ღირსეულ გარემოში ემუშავათ;

სასწრაფოდ დავაინიცირეთ კანონის გამკაცრება პოლიციელის შეურაცხყოფისთვის;

სასწრაფოდ გამოვუცხადეთ შეურიგებელი ბრძოლა ქურდულ სამყაროს, რასაც სხვათაშორის ეწინააღმდეგებოდით;

წერტილი დავუსვით ადამიანებისთვის ნარკოტიკების და იარაღის ჩადებას, რაც ოცნებისთვისაც არ იყო უცხო;

სასწრაფოდ დავიწყეთ სტატისტიკის გამოქვეყნება, ყველა დანაშაულის აღრიცხვა და სასწრაფოდ დავუსვით წერტილი სტატისტიკის გაყალბების ოცნების მავნე პრაქტიკას;

სასწრაფოდ აღვკვეთეთ ბასიანში ნარკოტიკებით ვაჭრობა და არაერთი ახალგაზრდა ვიხსენით სიკვდილისგან;

სასწრაფოდ აღვკვეთეთ პარლამენტზე შტურმი და ამ ქვეყანაში წერტილი დავუსვით ხელისუფლების ცვლილებას ძალადობით;

სასწრაფოდ შევქმენით ადამიანის უფლებების დაცვის დეპარტამენტი, რითაც პირველად ისტორიაში ძალოვანი უწყებისთვის პრიორიტეტად ვაქციეთ ადამიანის უფლებების დაცვა;

სასწრაფოდ დავიწყეთ მუშაობა არასრულწლოვნებისთვის სპეციალიზებული დანაყოფის შექმნაზე. სასწრაფოდ დავიწყეთ იზოლატორებში არასრულწლოვნის ინტერესზე მორგებული გარემოს შექმნა;

სასწრაფოდ ავაშენეთ დროებითი მოთავსების ახალი იზოლატორი, პატიმართა უფლებების სათანადო დასაცავად;

ქალთა მიმართ ძალადობის და დისკრიმინაციის ფაქტებზე ეფექტიანი რეაგირებით, სასწრაფოდ გავზარდეთ პოლიციის მიმართ ნდობა;

სასწრაფოდ გავხსენით ერთიანი მომსახურების ცენტრი, რომ მოქალაქეები არ გვეტანჯა.

და კიდევ არაერთი ნაბიჯი გადავდგით სასწრაფოდ პოლიციის მოშლის მიზნით, რამაც პირველად ისტორიაში შსს-ს საქმიანობის პოზიტიური შეფასება გამოიწვია არაერთ საერთაშორისო ანგარიშში.

დღეს ბატონი ივანიშვილი ამ ყველაფერს არქმევს დანაშაულს, ოღონდ პირადად ვერ ბედავს და წერილებს ამოფარებული გველაპარაკება. შესაბამისად, მისი დავალებების უსიტყვოდ შემსრულებელმა, ქართული სახელმწიფოს საქმის გამკეთებლებმა, სასწრაფოდ შეაჩერეს ჩვენს მიერ დაწყებილი პოლიციის მოშლა, რის შემდეგაც უმადურმა პოლიციელებმა

მაინც სისტემიდან გაქცევა დაიწყეს.

პ.ს. სამარცხვინოა იმ ხალხის ყურება, ვინც ნახევარი და ერთი პროცენტისთვის ამ წერილზე პარაზიტობთ.”