„ლელოს“ ოფისში ოპოზიციის სამუშაო შეხვედრა მიმდინარეობს

„ლელო საქართველოსთვის“ ოფისში ოპოზიციური პარტიების მორიგი სამუშაო შეხვედრა დაიწყო.

როგორც ოპოზიციის ლიდერებმა ჟურნალისტებს შეხვედრის დაწყებამდე განუცხადეს, შეხვედრა საკონსულტაციო, სამუშაო ხასიათს ატარებს. განსაკუთრებული ყურადღება დაეთმობა იმ დოკუმენტს, რომელიც ოპოზიციამ მმართველ გუნდს ფასილიტატორი ელჩების შუამავლობით გაუგზავნა.

„ევროპული საქართველოს“ წევრის, სერგი კაპანაძის თქმით, მსგავსი შეხვედრები მოლაპარაკებების მესამე რაუნდამდე თითქმის ყოველდღიურ რეჟიმში მიმდინარეობს. დღეს კი საკუთარ შეთავაზებაზე „ქართული ოცნების“ სავარაუდო პასუხის შესახებაც იმსჯელებენ.

„ახლა გავივლით დეტალებს იმასთან დაკავშირებით რა შეიძლება იყოს მათი სავარაუდო პასუხი და რა პოზიცია შეიძლება გვქონდეს. ჩვენი პოზიცია ამ წუთში ხდება უცვლელი“, – განაცხადა კაპანაძემ.

თავის მხრივ, გიგი უგულავამ აღნიშნა, რომ მოლაპარაკებების მესამე რაუნდი სავარაუდოდ უახლოეს დღეებში დაინიშნება.

„ჩვენი დოკუმენტი, რომელიც ბოლო შეხვედრაზე ელჩებს გადავეცით, მასზე იქნება მსჯელობა. ასევე, სტრატეგიაზე, თუ მესამე რაუნდი დაინიშნება. ასე რომ, შიდაოპოზიციური საკონსულტაციო შეხვედრაა და რაიმე ისეთი, ფუნდამენტური გადაწყვეტილებები დღეს არ მიიღება, რადგან ჩვენ პრინციპში, ყველა პარტიის მიერ, რომლებიც პარლამენტში არ შედის, ერთიანი დოკუმენტი შემუშავებულია. პლებისციტს ვუყურებ როგორც შუალედურ რგოლს, რათა რიგგარეშე არჩევნებამდე მივიდეთ. შესაბამისად, პლებისციტი არის მექანიზმი, ვკითხოთ ხალხს – უნდათ თუ არა რიგგარეშე არჩევნები“, – განაცხადა „ევროპული საქართველოს“ ერთ-ერთმა ლიდერმა.

კანონმდებლები საქმიანობას მომდევნო კვირიდან უნდა შეუდგნენ. გასარკვევია, მოხერხდება თუ არა დიალოგის მესამე რაუნდზე შეთანხმება. მეათე მოწვევის პარლამენტში, მმართველ პარტიასთან ერთად, კიდევ 8 პოლიტიკური სუბიექტი უნდა შევიდეს, თუმცა ოპოზიცია ჯერ კიდევ ბოიკოტს განაგრძობს. როდის დაინიშნება მოლაპარაკებების მესამე რაუნდი, ამ დრომდე უცნობია.