“ლანჩხუთში მეწყერი რამდენიმე ადგილზე ჩამოწვა. ერთ ბავშვს ვეძებთ”- ლანჩხუთის მერი

ამ დრომდე რთული ვითარებაა ლანჩხუთში, სადაც მეწყერმა საცხოვრებელი სახლები წაიღო.
ასევე, სტიქიის ზონაში ეძებენ მეოთხე კლასელს.

“რამდენიმე სახლია დაზიანებული. ერთ ბავშვს ვეძებთ, რომელიც სახლში იყო და სახლი მეწყერმა სრულად ჩაიტანა. ბევრ ადგილზეა მეწყერი. ჩვენი სამსახური უწყვეტ რეჟიმში მუშაობს,” განუცხადა ლანჩხუთის მერმა, ალექსანდრე სარიშვილმა “სფეისნიუსს”.

ძლიერმა წვიმამ გურიის რეგიონში პრობლემები შექმნა. რამდენიმე სოფელში წყალმა სახლების პირველი სართულები, ეზოები და სასოფლო-სამეურნეო ფართობები დატბორა.

მოსახლეობას დაუზიანდა საყოფაცხოვრებო ნივთები, ტექნიკა.

ლანჩხუთში მეწყრული პროცესების შედეგად, ათამდე სახლი გარესამყაროს მოწყდა.

ლანჩხუთისა და ოზურგეთის მუნიციპალიტეტებში მობილიზებულია მერიის შესაბამისი სამსახურები.

ამასთან, შინაგან საქმეთა სამინისტროს განცხადებით, გურიის და აჭარის რეგიონებში სტიქიის ადგილზე მობილიზებული არიან შინაგან საქმეთა სამინისტროს შესაბამისი დანაყოფების წარმომადგენლები და კომპეტენციის ფარგლებში ატარებენ საჭირო ღონისძიებებს.

მათივე ცნობით, ამ ეტაპზე გურიაში, სხვადასხვა სოფელში სამ პირს ეძებენ. მათ შორის 2 არასრულწლოვანია.