პოლიტოლოგი, ლევან ლორთქიფანიძე:
“ალბათ, ბევრს წაკითხული გაქვთ ჰაინრიხ ბიოლის სრულიად განსაკუთრებული რომანი “კლოუნის თვალთახედვა”, რომელიც პოსტნაცისტურ ეპოქაში გადანაცვლებულ გერმანიას აღწერს, მის ამაზრზენ მახასიათებლებზე, სიყალბესა და ორპირობით სავსე ყოველდღიურობაზე ამახვილებს ყურადღებას.
ომის შემდგომი ეპოქის საზოგადოების წევრები საკუთარი წარსულის გადაწერას ცდილობენ და რადგან ირგვლივ ყველას სურს ჭრილობებითა და სირცხვილით, მარცხითა და ტკივილით სავსე წლების დავიწყება; რადგან ახალ დროებაში ბევრი არქივი, დოკუმენტი, სამართლებრივი აქტი მასობრივმა ნგრევამ და უკანონობამ ნაცარტუტად აქცია, დასახულ მიზანს მარტივად აღწევენ! ნაცისტ ქალთა საზოგადოების ლიდერები ანტირასისტულ ასოციაციებს უდგებიან სათავეში; ნაცისტი მოხელეები გონიერ და პრაგმატულ მეწარმეებად წარმოჩნდებიან; ნაციზმის მასწავლებლები პატიოსანი ბიუროკრატის წარმატებულ კარიერას იწყობენ; კრიმინალები და წვრილმანი ხულიგნები ანტინაცისტური წინააღმდეგობის მოძრაობის მებრძოლთა მანტიას ისხამენ მხრებზე; კათოლიკური ეკლესია, რომელიც ფაქტობრივად დუმილით შეხვდა ნაციზმს და მხარი დაუჭირა ფაშიზმს, გამალებით ანგრევს ორი სხვადასხვა კონფესიის წარმომადგენელი ახალგაზრდის სიყვარულს!
ბიოლი ამ უკუღმართობის წინააღმდეგ ილაშქრებს და საზოგადოებას გაჯანსაღებისკენ მოუწოდებს. “არასდროს დავივიწყოთ, რათა აღარასდროს განმეორდეს” – დღემდე ამგვარი სულისკვეთებით ცხოვრებას ცდილობს გერმანიის პროგრესული ნაწილი…
საქართველო, თავისი მასშტაბებისა და სპეციფიკის გათვალისწინებით, უმძიმესი გამოცდის დაახლოებით იმავე ეტაპს გადის.
ომის დროინდელი არქივები არ გვაქვს, მაგრამ ჩვენს გვერდით ცხოვრობენ გადარჩენილი თორაძეები, სვანაძეები, სხვა ოჯახები, რომელთა ნათესავებიც ამოწყვიტეს, რომლებიც სისხლიან ანგარიშსწორებაში უშუალოდ ადანაშაულებენ შეწყალებულ რურუას! არავინ ითხოვს მტკიცებულებების გარეშე, კანონების ფეხქვეშ გათელვით ადამიანების დაპატიმრებას! უბრალოდ, მკვლელების ფერმერებად, მწიგნობართუხუცესებად, პოლიტპატიმრებად გასაღების უფლებას არ მოგცემთ !!! ათასი ევროპარლამენტარი რომ გადავიკიდოთ! ძალიან მაინტერესებს რა აქვთ სათქმელი ჩვენს ხელისუფლებას, ოპოზიციას, სამოქალაქო აქტივისტებს, ფერმერთა სამარცხვინო კავშირს გაუბედურებული და ცხოვრებადამახინჯებული ადამიანებისთვის?
სამუდამოდ გახანგრძლივებულ “ატხადნიაკში” ჩარჩენილი იდიოტებისა და მავნებლების, ქვეყნის მტრების პარტიის მარჯვენა განაყოფში განუცხადებიათ, დიდი შერიგების დრო დადგა, მიხეილ სააკაშვილი ქვეყანაში უნდა ჩამოვიდეს და არავითარ შემთხვევაში ციხეში არ უნდა ჩავსვათო. მიმიფურთხებია იმ შერიგებისთვის, რომელიც სინანულის არმქონე დამნაშავეებს მორიგ შანსს აძლევს, რომ ქვეყანას კიდევ ერთხელ, ძველი მეთოდებით გადაუარონ და გადაჯეგონ! მე იმ შერიგების არ მჯერა, რომელიც ნეოლიბერალური ავტორიტარიზმის ყველაზე სასტიკი რეპრესიების ავტორში მხოლოდ პოლიტიკურ დევნილს ხედავს! დამნაშავე დამნაშავეა, დამნაშავე ციხეში უნდა ჩაჯდეს… დამნაშავეს დაკარგულ პრინცესა ანად ვერ გამოაცხადებთ.
ეგრე არ გამოვა! არასდროს დავივიწყებთ, რათა აღარასოდეს განმეორდეს.
P.S. კუჭავები, მუჭავები, კობახიძე თეთრხალათიანი და ივანიშვილი ამ სიტყვებს შიშით ვერასდროს გაიმეორებენ. ამ შიშის გამო არიან პატარები”
კომენტარები