უკრაინის პრეზიდენტ ვოლოდიმირ ზელენსკის თქმით, დონალდ ტრამპმა ბოლო შეხვედრისას უთხრა, რომ უკრაინა Patriot-ის საჰაერო თავდაცვის სისტემებისთვის რაკეტების წარმოების ლიცენზიას მიიღებს.
“ტრამპმა ჩემთან ბოლო შეხვედრისას ხაზი გაუსვა: დიახ, საბოლოო გადაწყვეტილება მივიღე, უკრაინა Patriot-ის რაკეტების წარმოების ლიცენზიებს მიიღებს.” – განუცხადა ზელენსკიმ ჟურნალისტებს.
აშშ-ს მხრიდან ლიცენზიის გაცემის შესახებ ოფიციალური განცხადება ჯერ არ გავრცელებულა. 23 სექტემბერს აშშ-ს სახელმწიფო დეპარტამენტმა განაცხადა, რომ საბოლოო გადაწყვეტილება მიღებული არ იყო.
ზელენსკის თქმით, აშშ უკრაინას, რუსეთსა და ამერიკულ მხარეს შორის არაბთა გაერთიანებულ საამიროებში ტექნიკური შეხვედრის გამართვის წინადადებითაც გამოვიდა და ამ ეტაპზე კიევი შეხვედრის თარიღთან დაკავშირებით ვაშინგტონის წინადადებას ელოდება.
უკრაინის პრეზიდენტმა ასევე განაცხადა, რომ ეგვიპტის, ინდოეთის, თურქეთისა და ახლო აღმოსავლეთის წარმომადგენლებმა შავ ზღვაში მიმოსვლის აღდგენის საკითხიც წამოჭრეს. მისი თქმით, კიევმა მათ საპასუხოდ ცეცხლის ორმხრივი შეწყვეტა შესთავაზა, თუმცა, რუსეთის პასუხი ჯერ არ მიუღია.
კომენტარები