ბირმინგემის უნივერსიტეტის მეცნიერებმა კვლევის პირველადი შედეგი გამოაქვეყნეს, კვლევა დიდი ბრიტანეთის მიერაა დაფინანსებული.
”ადრეული [კვლევის] მონაცემები აჩვენებს, რომ SARS-CoV-2 ინფექციამ შეიძლება გამოიწვიოს ხანგრძლივი ავტოიმუნური გართულებები. არსებობს მტკიცებულებები, რომ SARS-CoV-2 ინფექციის შემდგომ გართულებებს შორის არის მთელი რიგი ავტოიმუნური დაავადებები, მათ შორის გიიენ-ბარეს სინდრომი”, – ნათქვამია მოხსენებაში.
კვლევა ჩატარდა 84 პაციენტზე, რომლებსაც კოვიდნფექციის რთული ფორმა ჰქონდათ და 19 პაციენტზე, რომლებსაც შედარებით სუსტად ჰქონდათ გამოხატული სიმპტომი და მათი კვლევის შედეგი შეადარეს საკონტროლო ჯგუფს 32 პაციენტის მონაცემთან, რომლებიც რეანიმაციაში მოხვდნენ სხვა მიზეზით და არა კორონაინფექციით.
ბირმინგემის უნივერსიტეტის პროფესორმა ალექს რიხტერმა განმარტა, რომ ანტისხეულები, რომლებიც კორონავირუსისგან გამოჯანმრთელებული პირების ორგანიზმშია ნაპოვნი, მსგავსია იმ ანტისხეულების, რომლებიც გულის, კუნთების და კანის სხვადასხვა ავტოიმუნურ დაავადებებს იწვევენ.
გიიენ-ბარეს სინდრომის უშუალო მიზეზი უცნობია, თუმცა შემჩნეულია, რომ ის უმეტესად რესპირატორული ან საჭმლის მომნელებელი სისტემის ვირუსული ინფექციიდან რამდენიმე კვირის შემდეგ ვითარდება.
კვლევის ავტორების თქმით, მათ საბოლოოდ არ აქვთ დადგენილი, ეს გართულება მხოლოდ კოვიდის მძიმე ფორმის შემდეგ ყალიბდება, თუ სხვა ინფექციით დაავადებულ მძიმე პაციენტებშიც და ამ კითხვას საბოლოოდ პასუხი კვლევის ბოლო ფაზაში გაეცემა.
გიიენ-ბარეს სინდრომის დროს იმუნური სისტემა, რომელიც ნორმაში მხოლოდ “უცხოს” უნდა უტევდეს, აზიანებს თავისივე ორგანიზმის ნერვებს. სინდრომის ერთ-ერთი ყველაზე გავრცელებული ფორმაა მწვავე მადემიელინიზებელი პოლირადიკულონეიროპათია. ამ დროს ზიანდება მიელინი – ნერვის მფარავი გარსი, რაც ხელს უშლის ნერვული იმპულსის ტვინამდე მიტანას. შედეგად ვიღებთ კუნთების სისუსტეს, მგრძნობელობის დაკარგვას და პარალიზს.
კომენტარები