“ხვიჩამდე ვიღაცამ ბურთი უნდა მიიტანოს, ამას ლოჩოშვილი ვერ აკეთებდა” – მეტრეველი

ჟურნალისტი, მერაბ მეტრეველი:

ზოგადად ოთხ მცველზე გადასვლის წინააღმდეგი არ ვარ. ოდესღაც უნდა შეგვეცვალა ტაქტიკა. ეს აუცილებელია განვითარებისთვის, რადგან ოთხ მცველიანი ტაქტიკა მეტი ვარირების საშუალებას იძლევა, მაგრამ ოთხი მცველის მუღამი ისაა, რომ ფლანგებზე სწრაფი ხალხი უნდა დააყენო, რომლებიც ელვისებურად ადიან შეტევაში და იქ მეტობას ქმნიან.

ჰოდა, როცა ამის გაკეთებას ვერ რისკავ და ფლანგზე ამპლუით ცენტრალურ მცველს აყენებ, რომელიც მძიმეა და სწრაფად ვერ დარბის, მაშინ ჯობია ისევ ხუთი მცველით ითამაშო.

როცა ლოჩოშვილი გაიყვანეს და აზაროვი შემოვიდა, სწორედ ამის მერე ათამაშდა ხვიჩა, რადგან ხვიჩამდე ვიღაცამ ბურთი უნდა მიიტანოს, გაუთამაშოს, მერე ჩაირბინოს და სივრცე გაუხსნას. ამას ყველაფერს ლოჩოშვილი ვერ აკეთებდა, რადგან ეს არაა მისი საქმე.

მოკლედ, თუ რისკავ და ოთხ მცველზე გადადხარ, მაშინ ბოლომდე უნდა გარისკო და სწრაფი მცველით დაიწყო. მაგრამ სანიოლმა ვერც ამ ამბავში გარისკა და ვერც იმაში, რომ ფორმაში არ მყოფი და ასაკში მყოფი კაშია სკამზე დაესვა.

ზოგადად კი წაგებაზე გული დიდად ნუ დაგწყდებათ, ამ ჯგუფიდან გამსვლელები მაინც არ ვიყავით და რაც ადრე დავინახავთ ამას, მით უკეთესი, შედეგს დავიკიდებთ და დარჩენილ მატჩებს ექსპერიმენტებისთვის და განვითარებისთვის გამოვიყენებთ.