“ხელისუფლებას გამოეპარა gen z თაობაო, რომ მიექცია ყურადღება, უკაცრავად პასუხია და ვის რა ფეხებს მოჭამდა?” – დავით ზურაბიშვილი

ეს ყველაფერი ნამდვილად ასეა და ვეთანხმები, მაგრამ მეორეს მხრივ რომ მიექცია ყურადღება, უკაცრავად პასუხია და ვის რა ფეხებს მოჭამდა? მთელი ხელისუფლება ხომ გონებრივად და ღირებულებრივად სადღაც 90-იანების შუახანებში გაჭედილი და მათი ერთადერთი ღმერთი და ყოვლისშემძლე პატრონი საერთოდ 80-იანების პერესტროიკის ეპოქაშია ჩარჩენილი? რა უნდა ელაპარაკოს ამ ხალხმა თანამედროვე ახალგაზრდობას, რა ენაზე უნდა ელაპარაკოს, რით უნდა მოხიბლოს და რით უნდა დააშინოს – ლგბტ პროპაგანდით, იეღოვას მოწმეებით თუ გლობალური ომის პარტიით? ირაკლი კობახიძე უნდა შესთავაზონ როლ მოდელად და მისაბაძ ნიმუშად, ირაკლი ღარიბაშვილი თუ დიტო სამხარაძე? თანამედროვე ახალგაზრდობასა და მმართველ ფენას შორის იმხელა მენტალური უფსკრულია, რომ მის ამოვსებას ბიძინა ივანიშვილის მილიარდები კი არა მთლად ანტიქრისტე რომ მოვიდეს და თავისი ტარტაროზებით ოცნების პიარ-სამსახურს უხელმძღვანელოს, ისიც ვერ შეძლებს.

ამიტომ, ვფიქრობ, ხელისუფლებას კი არ გამოეპარა ეს თაობა, არამედ ჩვენ ყველას გამოგვეპარა (თუ გაგვეპარა) ეს ხელისუფლება და მიზეზისა სხვისა და სხვისა ახლა ვართ სიტუაციაში, როცა 21-ე საუკუნის მესამე დეკადის საქართველო არის გასული საუკუნის 80-იანი წლების მენტალური რელიქტის ხელში, რომელიც საკუთარ ძალაუფლებას ახორციელებს იმავე საუკუნის 90-იანებში ჩარჩენილი რეტროგრადების ხელით.

თუმცა, მე პირადად გამოსარჩლებად ის მშველის, რომ დროის, ისტორიის და კალენდრის წინააღმდეგ ბრძოლა ჯერ არცერთ ხელისუფლებას არ მოუგია მსოფლიოში.”