უკრაინის შსს-ს ინფორმაციით, რუსი ოკუპანტების მიერ, კახოვკას ჰესის აფეთქების შედეგად, 27 ადამიანი დაკარგულად ითვლება, დაღუპულია 4, ხოლო ევაკუაციის დროს დაბომბვებისას 11 დაშავდა:
უწყების ცნობითვე, ხერსონის ოლქში 47 დასახლება დაიტბორა, მათგან 33 უკრაინის მიერ კონტროლირებად ტერიტორიაზე, 14 კი დროებით ოკუპირებულ ტერიტორიაზე.
“2620 ადამიანის ევაკუაცია განხორციელდა, მათ შორის 160 ბავშვია. დაიღუპა 4 ადამიანი. ევაკუაციის ღონისძიებების დროს დაბომბვის შედეგად 11 დაშავდა. მიკოლაევის რეგიონში დაიტბორა 31 დასახლება. ევაკუირებული იქნა 936 ადამიანი, მათ შორის 167 ბავშვი. 1 ადამიანი დაიღუპა.” ნათქვამია შსს-ს განცხადებაში.
ამავდროულად, დნეპროპეტროვსკის რეგიონში 26 დასახლებაში 89 ათასზე მეტ აბონენტს წყალმომარაგება არ აქვს. ადგილზე ორგანიზებულია სასმელი და ტექნიკური წყლის მიწოდება.
“ვცდილობთ გავაგრძელოთ საევაკუაციო ღონისძიებები, მაგრამ მტერი უმოწყალოდ ისვრის. ვმუშაობთ ადამიანების სიცოცხლისა და უსაფრთხოებისთვის. 12:55 საათისთვის დაკარგულად ითვლება 27 ადამიანი”, – აცხადებენ შსს-ში.
შეგახსენებთ, 6 ივნისის ღამეს ოკუპანტებმა კახოვკას ჰესის კაშხალი ააფეთქეს. დაიტბორა ათობით დასახლებული პუნქტი. ხერსონის ოლქის ოკუპირებულ მარცხენა სანაპიროზე რუსები ხალხს ევაკუაციის საშუალებას არ აძლევენ, ვრცელდება ინფორმაცია მსხვერპლის შესახებაც. უკრაინის ხელისუფლებამ დაუყოვნებლივ გამოაცხადა დატბორილი ტერიტორიების ევაკუაცია.
კომენტარები