“ჯონსონის ან მაკრონის მიმართვები არ გინახავთ? მინდა პრემიერი უკრაინაზე ისე არ ლაპარაკობდეს, როგორც ცხრა მთასა და ცხრა ზღვას იქით მდებარეზე” – ლორთქიფანიძე

ასეთი მნიშვნელობის მოვლენების შესახებ ქვეყნის პრემიერ-მინისტრმა საგანგებო მიმართვა უნდა გაავრცელოს.

სერიოზული პოლიტიკოსები მიმართვებს ქუჩაში ჟურნალისტებთან დისკუსიის ფონზე, ან მთავრობის სხდომის დაწყების წინ არეულ-დარეული მონოლოგის სახით არ ავრცელებენ.

მიმართვის ტექსტს წინასწარ ამზადებენ, ყველა სიტყვას წონიან, ტექსტს წინასწარ ამოწმებინებენ ჭკვიან ადამიანებს და მხოლოდ შემდეგ ავრცელებენ შესაბამის ვიდეოს.

ისეთი შთაბეჭდილება მრჩება, რომ მთავრობაში არავის არ აქვს ნანახი ბორის ჯონსონის ან ემანუელ მაკრონის მიმართვები.

2. არ ვემხრობი საქართველოს მიერ სანქციების დაწესებას, საჰაერო სივრცის ჩაკეტვას, ზედმეტ და ხმაურიან განცხადებებს. საკმარისი მგონია ევროსაბჭოში, ევროკავშირის განცხადებასთან მიმართებით პოზიციის დაფიქსირება.

უბრალოდ, მინდა, რომ საქართველოს პრემიერი უკრაინაზე ისე არ ლაპარაკობდეს, როგორც ცხრა მთასა და ცხრა ზღვას იქით მდებარე, ჩვენს ქვეყანასთან კავშირის არმქონე სახელმწიფოზე ისაუბრებდა. პრემიერ-მინისტრს უნდა შეეძლოს სიხისტისა და გულგრილობის გარეშე მსჯელობა.

3. ნაციონალური მოძრაობა, როგორც პოლიტიკური ძალა, მძულს. მჯერა, რომ ყველაფრის მკადრებლები არიან. პრემიერ-მინისტრზე უკეთ ვიცით მათ მიერ ჩადენილი დანაშაულებების შესახებ. ჩემ ირგვლივ ათობით ადამიანია, რომელთაც ირაკლი ღარიბაშვილზე მეტი გაუკეთებიათ ენმ-ის წინააღმდეგ. ზედმეტი მიდებ-მოდება არ გვჭირდება.

ამასთანავე, ჩნდება კითხვა – ამხელა საპარლამენტო უმრავლესობა რისთვის ჰყავთ? ამდენი ტელევიზია რისთვის აქვთ? დებატებსა და პარტიულ ორთაბრძოლებში დრო დეპუტატებმა, სპიკერებმა და სხვა მომხრეებმა დახარჯონ.

პრემიერ-მინისტრი ასეთ ვითარებაში სხვა სიმაღლეზე უნდა იდგეს, უფრო სერიოზულ შთაბეჭდილებას უნდა ტოვებდეს.

4. სანქციების მნიშვნელობის გაუფასურება დაუშვებელია. მათ შედეგები მოაქვთ პირდაპირი, ადვილად შესამჩნევი, მნიშვნელოვანი.”