ჯო ბაიდენი: ინფლაცია ამერიკელების საფულეს ურტყამს და ამ ტენდენციის შეცვლა ჩემი მთავარი პრიორიტეტია

ინფლაცია ამერიკელების საფულეს ურტყამს და ამ ტენდენციის შეცვლა ჩემი მთავარი პრიორიტეტია, – განაცხადა აშშ-ის პრეზიდენტმა, ჯო ბაიდენმა.

„ფასების ზრდის ყველაზე დიდი წილი ენერგომატარებლებზე ფასების ზრდას უკავშირდება. ეროვნულ ეკონომიკურ საბჭოს მივმართე, რათა ამ ხარჯების შემდგომი შემცირების მიზნით საჭირო ნაბიჯები გადადგან“, – აღნიშნა აშშ-ის პრეზიდენტმა.

აშშ-ის შრომის დეპარტამენტის მიერ დღეს გამოქვეყნებული მონაცემების თანახმად, ქვეყანაში სამომხმარებლო ფასები ოქტომბერში მოსალოდნელზე ბევრად უფრო სწრაფად გაიზარდა.

აშშ-ის შრომის დეპარტამენტის მონაცემებით, სამომხმარებლო ფასების ინდექსი (CPI) გასულ თვეში 0.9%-ით გაიზარდა, ხოლო 12 თვის განმავლობაში, ეს მაჩვენებელი 6.2%-ით გაიზარდა, რაც ბოლო 30 წლის განმავლობაში ყველაზე მაღალი მაჩვენებელია.

ანალიტიკოსები ელოდნენ, რომ სამომხმარებლო ფასების ინდექსი გასულ თვეში 0.5%-ით გაიზრდებოდა, ხოლო წლიური მაჩვენებელი – 5.8%-ით.

აშშ-ის შრომის დეპარტამენტში განმარტავენ, რომ ოქტომბერში ენერგომატარებლის ფასები 4.8%-ით გაიზარდა, მათ შორის, საწვავის ფასები 1.6%-ით, ხოლო სურსათის ფასები – 0.9%-ით.