ლევან ჯავახიშვილი
„ალიას“ ესაუბრება იურისტი, ვალერი გელბახიანი.
– ევროკომისიამ რეზოლუციაში 12 რეკომენდაცია ჩაგვიწერა, თუ ამათ შეასრულებთ წელს, გაზაფხულზე განვიხილავთ საქართველოსთვის ევროკავშირის სტატუსის მინიჭების საკითხსო. არადა, ეს თუ ეს 12 პუნქტი შეასრულეს „ქართულმა ოცნებამ“ და ბიძინა ივანიშვილმა, ეს იმას ნიშნავს, რომ ავტომატურად უნდა დატოვონ ხელისუფლება თუ სახელისუფლებო ბერკეტები, ერთმაც და მეორემაც. რა გამოდის,“ქართულ ოცნებას“ და ივანიშვილს ევროკომისია ეუბნება, რასაც 10 წელი აშენებდით, ის ავტოკრატიული რეჟიმი 6 თვეში დაანგრიეთო?
– აშენებდა რომ ვინმე რაიმეს? რომელიმე კანონი ამ 10 წელიწადში შეცვალეს ხალხის სასარგებლოდ? არა, ბატონო. მანკიერი სასამართლო სისტემა დატოვეს? დატოვეს. დანაშაულში მხილებული სამართალდამცავები დატოვეს სისტემაში? დატოვეს.ცხოვრების დონე წინ წავიდა ქვეყანაში? არ წასულა. დაბრუნდა უცხოეთში გაქცეული ხალხი ქვეყანაში? პირიქით, ამ 10 წელიწადში ძალიან ბევრი ადამიანი წავიდა. 10 წელი წინ მივდივართო, იძახიან და ატყუებენ ხალხს. რეალურად, უკან-უკან მიდოდა ეს ქვეყანა ეს 10 წელი. გვირაბის ბოლოს ველოდით სინათლეს და იქაც სიბნელე დაგვხვდა.
– მაშინ ეს 12 პუნქტი რატომღა ჩაწერა რეზოლუციაში ევროკომისიამ, როდესაც იციან, რომ არ შესრულდება? ნამუსზე ააგდეს ხელისუფლება?
– არა, რა ნამუსზე აგდება. ევროპას უნდა, რომ მიგვიღოს, გვეჩალიჩება, არიქა,თქვენი ჭირიმე, ქენით რაიმე, გააკეთეთ რაღაც, რომ მიგიღოთო. ამ მდგომარეობაში ვერ მიგვიღებდნენ და კიდევ 6 თვე მოგვცეს, იქნებ შეასრულონ ეს მოთხოვნები და მერე მოვიღოთო. თუმცა, რასაც ვუყურებ, რაც ხელისუფლების ლიდერების განცხადებებიდან ჩანს, 12 პუნქტს კი არა, იქიდან მართლა ერთ პუნქტს არ შეასრულებენ ესენი.
– ბიძინა ივანიშვილს დაასანქცირებენ?
– ვფიქრობ, ეგრე იქნება. ჯერ ევროპა გადადგამს ამისკენ ნაბიჯს და ევროპა რომ დაასანქცირებს ივანიშვილს, მერე ამერიკაც აამოქმედებს მის წინააღმდეგ სანქციებს.
კომენტარები