ანი დვალიშვილი
ამ კვირაში საშემოდგომო სესია იწყება და დღის წესრიგი პრეზიდენტის იმპიჩმენტის პროცედურები იქნება. „ქართული ოცნების“ თავმჯდომარემ ოფიციალურად განაცხადა, რომ საპარლამენტო უმრავლესობა მზად არის სალომე ზურაბიშვილის იმპიჩმენტისთვის, მაგრამ მათ ისიც კარგად იციან, რომ პრეზიდენტის გადასაყენებლად, 100 ხმის მოგროვება გაუჭირდებათ. ამის მიუხედავად, პროცედურები იწყება და ერთი შეხედვით, ეს პროცესი ჩანასახშივე განწირულია, თუმცა, ეს მხოლოდ ერთი შეხედვით.
„გადაწყვეტილება პოლიტსაბჭოს სხდომაზე იქნა მიღებული და რაღა თქმა უნდა, საქმის კურსში ჩააყენეს ბიძინა ივანიშვილიც, თუმცა, ივანიშვილის მხრიდან არანაირი პასუხი არ ყოფილა, რაც პოლიტ-საბჭომ თანხმობად მიიღო და მოქმედებაც დაიწყო. პარლამენტში ამ პროცესის პარალელურად, საპარლამენტო უმრავლესობა, კონკრეტულად კი, ირაკლი კობახიძე, სარჩელსაც ამზადებს და უზენაეს სასამართლოში მიდის, რათა პრეზიდენტის ბოლო ქმედება არაკონსტიტუციურად შეფასდეს, ანუ პრეზიდენტს ოიფიციალურად დაუმტკიცდეს კონსტიტუციის დარღვევა, რაც „ოცნებას“ მიაჩნია, რომ აშკარად წაადგება“,– ეუბნება „ალიას“ წყარო.
მისივე თქმით, ივანიშვილმა დუმილი შეგნებულად არჩია, რადგან თუ ეს პროცესი არ გაამართლებს, ხელს პოლიტ-საბჭოსკენ გაიშვერს და იტყვის, რომ მათ არასწორი გადაწყვეტილება მიიღეს. რა შემთხვევაში შეიძლება არ გაამართლოს ამ პროცესმა? როგორც გვეუბნებიან, „ნაციონალური მოძრაობის“ ორმა ლიდერმა, ზურაბიშვილის გარემოცვასთან (და არა უშუალოდ ზურაბიშვილთან) კონტაქტი უკვე დაამყარა და პრეზიდენტს მიხეილ სააკაშვილის შეწყალება შესთავაზეს, სანაცვლოდ კი, „ოცნებას“ იმპიჩმენტში მხარს არ დაუჭერენ. წინააღმდეგ შემთხვევაში, ნაციონალები პროცესის მხარდაჭერით ვაჭრობენ… თუმცა…
საპარლამენტო უმრავლესობის თუ უმცირესობის სურვილების პარალელურად, არსებობს კანონი, რომელიც ითვალისწინებს, რომ იმპიჩმენტით გაშვებული პრეზიდენტის ადგილმონაცვლე უნდა აირჩეს, მაგრამ კონსტიტუციაში გვიწერია (ზურაბიშვილის ინაუგურაციამდე ჩავწერეთ), რომ ქალბატონი სალომე ბოლო პრეზიდენტია, რომელიც ხალხმა აირჩია და მის მემკვიდრეს უკვე 300 ადამიანი აირჩევს. ახლა კი, გამოვა, რომ ისევ ახალი არჩევნები უნდა ჩატარდეს, ისევ ძველი სისტემით, რაც კონსტიტუციის დარღვევაა. ზურაბიშვილს ვადა მომავალი წლის დეკემბერში გასდის და თუ მას გადააყენებენ, არჩევნები მაისში უნდა გაიმართოს და ახალი პრეზიდენტი დეკემბერში უნდა ავირჩიოთ, მაგრამ აქ კიდევ ერთი შეუთავსებლობაა – ახალი პრეზიდენტის ასარჩევად, აუცილებელია ოფიციალური ვადის ამოწურვამდე, ყველაზე ცოტა, ექვსი თვე იყოს დარჩენილი. არჩევიდან ინაუგურაციამდე ერთი თვე აუცილებლად გავა, ანუ ივნისიდან დეკემბრამდე… ექვსი თვე კი რჩება, მაგრამ ეს იმ შემთხვევაში, თუ დღეებს ზუსტად დაამთხვევენ, თან კონსტიტუციასაც დაარღვევენ. არსებობს კიდევ ერთი ვარიანტი, ზურაბიშვილი სახლში გაუშვან და… მომდევნო ერთი წელი პრეზიდენტი უბრალოდ არ გვყავდეს.
რეალურად, სიტუაცია არც ისე მარტივია, როგორც ერთი შეხედვით ჩანს. „ალიას“ წყარო გვიყვება, რომ „ოცნების“ ლიდერებს უტყუარი ინფორმაცია მიუტანეს, რომლის მიხედვითაც, ქალბატონი სალომე სააკაშვილის შეწყალებას ახალ წლამდე აპირებს. ეს კი, მმართველი გუნდისთვის პროცესების სასურველი სცენარით განვითარება ნამდვილად არ არის და თავისუფლებაზე მყოფი მიშა, წინასაარჩევნო პერიოდში ძალიან სახიფათო იქნება. ჰოდა, თუ ზურაბიშვილს საპარლამენტო უმრავლესობა ვერ მოეერევა, იქნება სარჩელი უზენაეს სასამართლოში და თუ სასამართლო მის ქმედებას, როგორც არაკონსტიტუციურს, ისე შეაფასებს, შემდეგ მმართველ ძალას შეეძლება იმის თქმა, რომ კონსტიტუციის დამრღვევ პრეზიდენტს არ უსმენს და შესაძლოა, ის უბრალოდ, კანონგარეშე გამოაცხადონ. უახლოეს დღეებში აუცილებლად დაისმევა კითხვა – ვინ დააფინანსა ზურაბიშვილის ევროპული ვოიაჟი, რაც მცირე თანხებთან ნამდვილად არ არის დაკავშირებული? ხელისუფლების წარმომადგენლები გვეუბნებიან, რომ ამ ვოიაჟისთვის პრეზიდენტი ბიუჯეტიდან ერთ თეთრსაც ვერ მიიღებს, მაგრამ ფაქტია, ქალბატონი სალომე მოგზაურობს, სასტუმროში ჩერდება თავის „ამალასთან“ ერთად და ეს ყველაფერი ფული ღირს. ძაღლის თავიც აქ არის დამრხული – ფინანსები არც თავად პრეზიდენტს გადაუხდია, არც ხელისუფლებას და… ჩვენი ინფორმაციით, პრეზიდენტი ერთ-ერთმა ევროპულმა ორგანიზაციამ დააფინანსა და ეს ორგანიზაცია საქართველოში რამდენიმე არასამთავრობოს დონორიც გახლავთ. ისე გამოდის, რომ კონკრეტული ორგანიზაცია საქართველოს შიდა საქმეებში უხეშად ერევა და ხელისუფლებას კიდევ ერთხელ ექნება შესაძლებლობა, „უცხოური გავლენის აგენტების შესახებ კანონზე“ ხმამაღლა ილაპარაკოს და აღნიშნოს, რომ ეს ყველაფერი მაშინ სულ ტყუილად ჩააგდეს.
პროცესების პარალელურად, შარლ მიშელმა თარიღი დაგივსახელა და დაგვპირდა – 2030 წელს, ევროკავშირი მზად იქნება გაფართოებისთვის და მთავარია, მზად საქართველოც იყოსო. მიშელის განცხადება ევროპარლამენტარებმა დაგმეს, გაუგებარი უწოდეს და სიმართლე გითხრათ, მართლაც გაუგებარია. თან მედალს მეორე მხარეც აქვს – 2030 წელს, შარლ მიშელი ამ თანამდებობაზე ნამდვილად აღარ იქნება და ვის ან რის გამო იღებს ასეთ პასუხისმგებლობას, უცნობია. ისე, შარლ მიშელის გარდა, პრეზიდენტს გერმანელი კოლეგაც შეხვდა და თუ ეს ვიზიტები არაოფიციალურია (როგორც მთავრობა გვიმტკიცებს), გამოდის, ზურაბიშვილი საოჯახო საქმეებზე ესაუბრება ევროპელ ლიდერებს? ან, თუ არაოფიციალურია, მეგობარი და პარტნიორი ევროპა, რატომ იღებს პრეზიდენტს მთავრობის ნებართვის გარეშე? რეალურად, დასავლეთში ყველა თანხმდება იმაზე, რომ დღევანდელი ხელისუფლება შესაცვლელია და ამას ღიად აფიქსირებენ, არ ითვალისწინებენ არც მათ მოსაზრებას და არც მათ მოთხოვნას, ანუ ზუსტად ისე იქცევიან, როგორც ხელისუფლება ექცევა დასავლეთს – მათი მოსაზრებები ნაკლებად აინტერესებს.
სხვათა შორის, იმასაც გვეუბნებიან რომ ამ პროცესით, საპარლამენტო უმრავლერსობას სხვა, უფრო დიდი პრობლემის გადაფარვა სურს. საუბარი შოვის ტრაგედიაზეა, კონკრეტულად კი, გვიან დაწყებულ სამაშველო ოპერაციაზე. ამბობენ, რომ რამდენიმე უცხოელმა ექსპერტმა გამოთქვა მოსაზრება, სამაშველო ოპერაციის დროულად დაწყების შემთხვევაში, რამდენიმე ადამიანის გადარჩენა შეიძლებოდა, თანაც, პრევენციული ღონისძიებების გატარება იყო შესაძლებელიო და ამ პროცესმა საქართველოს მოსახლეობა შეიძლება ისე გაამწაროს, ქუჩაში გამოვიდეს, აი, სალომესთვის ქუჩაში ნამდვილად არავინ გამოვა, სამაგიეროდ, დუღილის ტემპერატურა აიწევს ბოლომდე და როგორც წესი, ასეთ დროს, პოლიტიკოსებს ადამიანური ტრაგედიები ნაკლებად ახსოვთ და აღელვებთ.
საპარლამენტო ოპოზიცია სესიებზე გააქტიურდება, ყველაფერს გააკეთებენ იმისთვის, რომ უმრავლესობის წევრები „ააგდონ“ და მუშტი-კრივი გაამართვინონ. ამისთვის უმრავლესობაც მზად არის და უკან დახევას არავინ აპირებს. დაზუსტებით შეგვიძლია გითხრათ, რომ საშემოდგომო სესიაზე არაერთ გაწევ-გამოწევას და გინებას ვიხილავთ, რადგან ზუსტად ერთ წელიწადში არჩევნებია და პარტიები ერთმანეთს „კვერცხებს“ საჯაროდ დაატოლებენ. მეტიც, უმრავლესობის კონკრეტულ წევრებს შესაბამისი მითითება აქვთ, ვის როგორ უნდა უპასუხონ და ვის უნდა დაარტყან, ვის თავზე ხელი გადაუსვან და ა.შ.
სხვისი რა გითხრათ, მაგრამ ჩვენი აზრით, სააკაშვილის გათავისუფლების შემთხვევაში, პოლიტიკური პროცესები თავდაყირა დადგება და ახლა „სიკვდილის პირას მყოფი“ მიშა, ძალიან მალე გამოჯანმრთელდება, ჩვეული ენერგიულობით დაიწყებს მოქმედებას და…. სწორდ ამიტომ, „ქართული ოცნება“ პრეზიდენტს ან პარლამენტის, ან უზენაესი სასამართლოს მეშვეობით, კანონგარეშედ გამოაცხადებს და მისი ყველა ქმედება შეფასდება როგორც უკანონო. შესაბამისად, სააკაშვილის შეწყალების შემთხვევაშიც კი, მისი ციხიდან გამოსვლის შანსი ნულს გაუტოლდება…
კომენტარები