“ივანიშვილი არასოდეს დამიშანტაჟებია… ეს პარლამენტარი არც ერთ შეხვედრას არ დასწრებია” – ელჩი

საქართველოში აშშ-ის ელჩმა, კელი დეგნანმა მიხეილ ყაველაშვილის მიერ გახმოვანებულ ვარაუდზე, რომლის მიხედვითაც უკრაინაში რუსეთის ომის დაწყების შემდეგ კელი დეგნანი ბიძინა ივანიშვილს შეხვდა და “რაღაც მოსთხოვა” და ხომ არ იყო ეს შანტაჟი, კომენტარს აკეთებს და ამბობს:

“საკმაოდ დიდი ხანია ბიძინა ივანიშვილთან არ მქონია შეხვედრა. ამ ორ წელიწად ნახევრის განმავლობაში, რაც მე საქართველოში ვარ, როცა კი მქონდა მანამდე მასთან შეხვედრები, მას ყოველთვის ვარწმუნებდი აშშ-ის სრულ მხარდაჭერაში ქართველი ხალხის მიმართ და ასევე მზაობაზე, რომ ვიმუშაოთ საქართველოს მთავრობასთან ქვეყნის ევროატლანტიკური მომავლის, დემოკრატიული და ეკონომიკური განვითარების კუთხით. არცერთ ასეთ შეხვედრაზე მე მასზე ჟანტაჟი არასდროს განმიხორციელებია, ეს არ შეესაბამება სიმართლეს… პარლამენტის ამ წევრს, რომელიც ამაზე საუბრობს ყოველგვარი ინფორმაციის გარეშე, პირადად არ ვიცნობ. არ ვიცი, რატომ ამბობს ამას, რადგან ის არცერთ ამ შეხვედრას არ დასწრებია.”