“იტალიაში მივხვდი, თუ რა დიდებული ქვეყანა გვაქვს, მართლა დიდება საქართველოს!” – ჩუთლაშვილი

ბლოგერი, დავით ჩუთლაშვილი:

ახლა ერთი უცნაური და ძალიან საამაყო ამბავი უნდა მოგითხროთ, რომელიც იტალიაში ყოფნის დროს გადამხდა. მოკლედ, მილანში ვარ, სასტუმროში და ველოდები, ადმინისტრატორი როდის დამაბინავებს და გასაღებს როდის გადმომცემს. ჩემ გვერდით ვხედავ რამდენიმე ბიჭს, რომლებიც ბრიტანული ინგლისურით ლაპარაკობენ. ჰოდა, სანამ მე დავბინავდებოდი, მოვისმინე, რომ ერთი ბიჭი ეუბნებოდა დანარჩენებს, ყოველთვის ისე მოიქეცით, როგორც დავით აღმაშენებელს მოეწონებოდაო.

თავიდან ვიფიქრე, მომესმა-მეთქი, მაგრამ მერე, როცა ადმინისტრატორმა ჩემი გვარი ამოიკითხა, ეს ექვსივე ბიჭი ჩემკენ შემოტრიალდა. აღფრთოვანებულები მათვალიერებენ, მიყურებენ, როგორც მე დავუწყებდი ყურებას ალბათ ცოცხალი ჯონ ლენონი რომ მენახა. ბოლოს ერთმა გაბედა და მკითხა, ქართველი ხარო? კი, ქართველი ვარ-მეთქი. დავით აღმაშენებელზე რამე თუ გსმენიაო. მე ვუპასუხე, რას ჰქვია, მსმენია, დედაჩემმა სახელი საერთოდაც მაგ მეფის საპატივსაცემოდ დამარქვა-მეთქი და იქ ატყდა ისეთი ამბავი, ენით ვერ აღგიწერთ.

თურმე ეს ყოფილა დავით აღმაშენებლის ბრიტანული ფანკლუბი. ის ბიჭები, ყველა ყოფილან დავით აღმაშენებლის ფანები. და თურმე ბრიტანულ Gen Z-ის ერთ ნაწილში დავითი ყოფილა დღეს ძალიან პოპულარული მეფე.

ვილაპარაკეთ და ვილაპარაკეთ. დავითის ყველა ბრძოლა იცოდნენ, მთელი საქართველოს იმ პერიოდის ისტორია და ჭკუაზე აღარ ვიყავით.

იმ დღეს იმ ბრიტანელმა ბიჭებმა დამპატიჟეს და მაგრად მოვულხინეთ. სულ ლამბრუსკო რეჯიანო ვსვით.

რატომ მოვაყოლე ეს ამბავი: უდიდესი ისტორიის მქონე ერი ვართ, რომელიც ამ ისტორიას სათანადოდ არ აფასებს. ისევ უცხოელი თუ დაგანახებს საკუთარ დიად წარსულს და დაგაფიქრებს მასზე.

ის ბიჭები მერე საქართველოში დავპატიჟე, გელათს უნდა ვეწვიოთ და დავითის საფლავი მოვინახულოთო, ასე თქვეს, მაგრამ ორიოდე კვირაში დაიწყო ის ჯოჯოხეთური პანდემია.

და კიდევ ერთს იმას დავამატებ, რომ დავით აღმაშენებლის ფანკლუბი კი არა, რუსებმა დღემდე ისიც არ იციან, ასეთი მეფე საერთოდ თუ არსებობდა ამ პლანეტაზე. რუსები მთელი ცხოვრება იმას ცდილობდნენ, ჩვენ თვითონ დაგვევიწყებინა ჩვენი ისტორია, არათუ თავად ესწავლათ ის და ქართველი მეფეების ფანკლუბები ეკეთებინათ.

მოკლედ, იტალიაში მივხვდი, თუ რა დიდებული ქვეყანა გვაქვს. მართლა დიდება საქართველოს! ჩვენ კიდევ ვიტყვით ამქვეყნად ჩვენს სათქმელს! ევროკავშირსა და ნატოშიც შევალთ და მსოფლიოს ერთ-ერთი ყველაზე წარმატებული და მისაბაძი ქვეყანაც გავხდებით. მე ამის ღრმად მწამს! ????