გაეროს ადამიანის უფლებათა უმაღლესმა კომისარმა, ვოლკერ თურქიმ განაცხადა, რომ ისრაელსა და ღაზაში ომის დანაშაული კონფლიქტის ორივე მხარემ ჩაიდინა.
“7 ოქტომბერს პალესტინის შეიარაღებული ჯგუფების მიერ ჩადენილი სისასტიკე საზარელი, სასტიკი და შოკისმომგვრელი იყო. ეს, ისევე როგორც მძევლების აყვანა, ომის დანაშაულია”, – თქვა თურქიმ ოთხშაბათს, რაფაჰის სასაზღვრო პუნქტთან საუბრისას.
მანვე აღნიშნა, რომ ღაზაში ისრაელის თავდასხმების შედეგად დაიღუპნენ, დაშავდნენ და დასახიჩრდნენ მშვიდობიანი მოქალაქეები, მათ შორის, ქალები და ბავშვები.
“ისრაელის მიერ პალესტინელი მშვიდობიანი მოსახლეობის კოლექტიური დასჯა ასევე უტოლდება ომის დანაშაულებს, ისევე როგორც მშვიდობიანი მოსახლეობის უკანონო ძალადობრივი ევაკუაცია”, – თქვა მან.
შეგახსენებთ, რომ 7 ოქტომბერს, ღაზას სექტორიდან ისრაელზე მოულოდნელი სარაკეტო და სახმელეთო თავდასხმა წამოიწყეს. თავდასხმაზე პასუხისმგებლობა ტერორისტულმა დაჯგუფება “ჰამასმა” აიღო და მას ოპერაცია “ალ-აკსას შტორმი” უწოდა.
სარაკეტო იერიშის საპასუხოდ ისრაელის თავდაცვის სამინისტრომ საომარი მდგომარეობა და ოპერაცია “რკინის ხმლების” დაწყება გამოაცხადა.
წყარო – მთავარი არხი
კომენტარები