ნეტგაზეთის ინფორმაციით, POSTV-ის გადაცემა “დღის პოსტი” ირმა სოხაძისა და მანუ მურღულიას გარეშე აგრძელებს მუშაობას. 29 მაისიდან გადაცემას ახალი წამყვანები ჰყავს – მსახიობი ნატუკა გულიაშვილი და ტელეწამყვანი რუსკა ხვედელიძე.
მედიის ინფორმაციით, მანუ მურღულია ტელევიზიიდან გაუშვეს.
“აღარ ვმუშაობ ამ არხზე. ეს არის მხოლოდ ჩემი კომენტარი”, – მხოლოდ ამას ამბობს მანუ მურღულია გამოცემასთან.
მანუ მურღულია აღარ თანამშრომლობის ამავე არხის ბაზაზე შექმნილ “ნიკოს ბენდთან”. მუსიკალურ ჯგუფში მურღულია სხვა მომღერალმა, ანანო სამხარაძემ ჩაანაცვლა.
რაც შეეხება ირმა სოხაძეს, დაახლოებით ორი კვირის წინ თქვა, რომ გადაცემა შეჩერდა. იქამდე, რამდენიმე დღით ადრე სოხაძე რუსული კანონის საწინააღმდეგოდ გამოვიდა.
“უნდა შეველიოთ ამ კანონპროექტს და მშვიდად გავაგრძელოთ ცხოვრება. გავაკეთოთ ის, რაც ჯობია ჩვენი ქვეყნისთვის და იმ ახალგაზრდებისთვის. პროტესტს ხელოვნურად ვერ გავაჩერებთ, ვერაფრით შევეწინააღმდეგებით”, – თქვა მაშინ სოხაძემ.
POSTV-ის კიდევ ერთი გადაცემის, “პოსტ ალიონის” წამყვანი, მსახიობი ანა ამილახვარი ამბობს, რომ რუსულ კანონთან დაკავშირებული პოზიციის გამო ტელევიზიიდან გაათავისუფლეს. უფრო ზუსტად, სოციალურ ქსელში დაწერილი კომენტარის გამო, რომელიც მან ანტირუსულ აქციაზე მოქალაქეთა ძალადობის წინააღმდეგ დაწერა.
კომენტარები