ირანის საპრეზიდენტო არჩევნებში იბრაჰიმ რაისის გამარჯვების შესახებ ინფორმაციას ირანის ცენტრალური საარჩევნო კომისია ავრცელებს. ოფიციალური მონაცემით, ხმები ასე გადანაწილდა – იბრაჰიმ რაისიმ 17,6 მილიონი ხმა, მოჰსენ რეზაიმ – 3,3 მილიონი ხმა, აბდულნასერ ჰემატიმ – 2,4 მილიონი ხმა, კაზიზადე ჰაშემიმ კი მილიონზე მეტი ხმა მიიღო.
იბრაჰიმ რაისი ირანის მთავარი მოსამართლეა. მას აშშ-ის მიერ სანქციები აქვს დაწესებული.
რაისის სახელი პოლიტიკური პატიმრების სიკვდილით დასჯას უკავშირდება.
პრეზიდენტი ირანში ქვეყნის მეორე პირია, პირველი – მისი უზენაესი ლიდერია – აიათოლა ალი ხამენეი.
პრეზიდენტს მნიშვნელოვანი გავლენა აქვს საშინაო და საგარეო პოლიტიკაზე. თუმცა, ირანის პოლიტიკურ სისტემაში გადამწყვეტი სიტყვა სწორედ უზენაეს ლიდერს, აიათოლა ალი ხამენეის ეკუთვნის, უმაღლესი სასულიერო პირს.
ირანი კონსერვატიული რელიგიური შეხედულებების მიხედვით 1979 წლიდან იმართება, როცა ისლამური რევოლუცია მოხდა და პოლიტიკური თავისუფლება შეიზღუდა.
ირანელების ნაწილი ფიქრობს, რომ არჩევნებზე ყველაფერი გაკეთდა იბრაჰიმ რაისის გასამარჯვებლად, მაგალითად, არჩევნებისას, რომელიც 18 ივნისს გაიმართა, კენჭისყრის პროცესი უნდა დასრულებულიყო 00.00 საათზე, თუმცა, დასრულდა 02.00 საათზე და ეს ამომრჩევლის მაღალი აქტივობით აიხსნა.
