“ინწრას სათავეში მეწყერი ჩამოწვა – სიტუაცია კონტროლირებადია” – ვანო ბურდული

ინწრას სათავეში მეწყერი ჩამოწვა, – ინფორმაციას წალენჯიხის მერის მოვალეობის შემსრულებელი, ვანო ბურდული, ავრცელებს.

“დაახლოებით 17:00 საათისთვის ჩქვალერის მოსახლეობას შეუწყდა წყალის მიწოდება, ჩვენი, შესაბამისი სამსახურის თანამშრომელები, მყისიერად ავიდნენ ინწრას ხეობის სათავესთან, ადგილზე, საიდანაც სასმელი წყლით მარაგდებოდა წალენჯიხის სოფლები: ჩქვალერი, საჩინო, ზედასაჩინო და ეწერი.

აღმოჩნდა, რომ მილების დაერთების სათავე მთლიანად მოშლილია სტიქიის მიერ და წაღებული. დაახლობით 70 მეტრის სიგრძის მილები ჩამოტანილია ხეობაში.

მიღებული ინფორმაციის შესწავლის, შეფასების, გადამოწმების შემდეგ, შემიძლია ვთქვა, რომ ამ ეტაპზე ჩახერგვის და დაგუბების საშიშროება არ არსებობს. წყალი ჩვეულებრივად მოედინება და როგორც კი მოგვეცემა საშუალება და ამინდი შეგვიწყობს ხელს, აღვადგენთ წყლის მიწოდებას.

კიდევ ერთხელ მინდა მოსახლეობა დავამშვიდო, – ამ ეტაპზე დაგუბების და ჩახერგვის საფრთხე არ არსებობს. სიტუაცია სრულად კონტროლირებადია.

მერია გააგრძელებს ინტენსიურ დაკვირვებას აღნიშნულ ტერიტორიაზე და როგორც უკვე ვთქვი, როგორც კი ამინდი შეგვიწყობს ხელს, დაიწყება წყლის მიწოდების აღდგენის სამუშაოები.“, – განაცხადა ვანო ბურდულმა.