სინდისის პატიმრების ოჯახის წევრების მიერ გმირთა მემორიალთან, 8 აპრილს დაგეგმილ საპროტესტო აქციას სტუდენტები უერთდებიან.
უმაღლესი საგანმანათლებლო დაწესებულებების წარმომადგენლები სოციალურ ქსელში წერენ, რომ ისტორიულ დღემდე ერთი დღით ადრე მნიშვნელოვანია ქუჩაში საზოგადოების დიდი ნაწილი გამოვიდეს და თავისუფლების დაკარგვაზე ივანიშვილის რეჟიმს კვლავ უარი უთხრას.
სტუდენტების მიერ გავრცელებული განცხადებიდან ირკვევა, რომ საპროტესტო აქციაში მონაწილეობას ილიას სტუდენტური მოძრაობა, სეუს სტუდენტური მოძრაობა, ფრიუნისა და აგრუნის სტუდენტური მოძრაობა, თეატრალური უნივერსიტეტის სტუდენტური მოძრაობა, კონსერვატორია ევროპისთვის, თსსა-ის სტუდენტები ევროპული მომავლისთვის, ბასტიონი, მომავლის მკურნალები და თავისუფალი აუდიტორია მიიღებს.
სტუდენტები ყოველთვის იყვნენ ცვლილებების გამომწვევი ძირითადი ძალა, რომლებმაც ძალიან დიდი როლი ითამაშეს ჩვენი ქვეყნის დამოუკიდებლობის მოპოვებაში. გვჯერა, რომ ჩვენ ბოლომდე ვიბრძოლებთ სინდისის პატიმრების თავისუფლებისათვის და იმ იდეისათვის, რომლისთვისაც ისინი ამჟამად უკანონოდ ციხეში სხედან.
8 აპრილს, სინდისის პატიმრების ოჯახებთან ერთად, მნიშვნელოვანია, რომ ვიყოთ ბევრნი და მტკიცენი. მივაგოთ პატივი გმირებს, რომლებმაც თავი გაწირეს ქართული ეროვნული იდეისათვის. რუსულ რეჟიმს მხოლოდ და მხოლოდ ჩვენი გაუტეხელობით დავამარცხებთ.
9 აპრილი ისტორიული თარიღია, ესაა დღე გამარჯვებისა და თავგანწირვის. ესაა ის მონაპოვარი, რომლის დაკარგვის უფლება უბრალოდ არ გვაქვს. გვჯერა, რომ ქართველი სტუდენტები ისევე, როგორც წარსულში, ახლაც იდგებიან ისტორიის სწორ მხარეს. გელოდებით!” – ნათქვამია განცხადებაში.
ცნობისთვის, სინდისის პატიმრების ოჯახის წევრები საზოგადოებრივ მოძრაობას ქმნიან. მათი თქმით, 8 აპრილს გმირთა მემორიალთან შეიკრიბებიან და ღამეს გაათენებენ.
კომენტარები