რისთვის უხდის ბოდიშს ქართველ ხალხს „რუსეთის ჯავახური დიასპორის“ პრეზიდენტი -

387

მოსკოვსა და ერევანს შორის, “ლაზარევის კლუბის” მე-5 სხდომის ჩარჩოებში გამართული შეხვედრის დროს, პოლიტოლოგ მიგრანიანის მიერ საქართველოსა და ქართველი ხალხის უხეშად მოხსენიებას, ღია წერილით პასუხობს საზოგადოებრივი ორგანიზაციის „რუსეთის ჯავახური დიასპორა“ პრეზიდენტი აღასი არაბიანი.

“ლაზარევის კლუბის” მეხუთე შეხვედრა, მიმდინარე წლის 28 ოქტომბერს დაინიშნა და მეც, როგორც კლუბის დანარჩენი წევრები, ერევანში გასამგზავრებლად ვემზადებოდი. თუმცა გამგზავრების წინა დღეს, სამწუხაროდ, მოგზაურობა ცნობილი მიზეზების, კერძოდ, კლუბის კოორდინატორის კონსტანტინე ზატულინის მიერ ჩვენთვის სომხეთში შესვლის უსამართლო და უკანონო აკრძალვის გამო გაუქმდა.

იმისათვის, რომ დაგეგმილი სხდომა არ ჩაშლილიყო, კლუბის საბჭომ მიიღო გადაწყვეტილება ტელეკონფერენციის „მოსკოვი-ერევანი-მოსკოვის“ ვიდეოხიდის სახით ჩატარების შესახებ. კლუბის შეკრების დასაწყისში მოსკოვიდან და ერევნიდან მომხსენებლების მონაცვლეობით გამოსვლა გადაწყდა.

როცა ანდრანიკ მიგრანიანის გამოსვლის ჯერი მოვიდა, მან მოულოდნელად გამოთქვა უხეში სიტყვები ჩვენი მეგობარი და სომხეთის მეზობელი ხალხის მიმართ. ბუნებრივია, მისი გამოსვლა არ მოიწონეს ტელეკონფერენციის მონაწილეებმა და მათ შორის პირადად მე, საქართველოსა და და ქართველი ხალხის დიდმა და ნამდვილმა მეგობარმა.

ვინაიდან პირდაპირ მომხსენებლის გამოსვლის ჩაშლა მიუღებელი იყო, შესაბამისად, შესვენების დროს მივუახლოვდი მიგრანიანს და გამოვხატე ჩემი აღშფოთება და უკმაყოფილება. რაზეც მან მიპასუხა, რომ მისი უხეში განცხადება არა ქართველი ხალხის, არამედ საქართველოს ხელმძღვანელობის მიმართ იყო გაკეთებული.

თამამად შემიძლია დაგარწმუნოთ, რომ ანდრანიკ მიგრანიანის უყურადღებო განცხადება არ შეესაბამება არც ნამდვილ სულს და არც საერთაშორისო რუსულ-სომხური „ლაზარევის კლუბის“ საქმიანობის დეკლარირებულ პრინციპებს. ასევე შემიძლია დარწმუნებით ვთქვა, რომ როგორც სომეხი, ასევე რუსი ხალხის უმეტესობა არ იზიარებს ისეთ პოზიციას, რომელიც შეურაცხყოფს და ამცირებს მოძმე ქართველ ხალხს.

როგორც ერთ-ერთი ყველაზე დიდი საზოგადოებრივი დიასპორული ორგანიზაციის ხელმძღვანელი, რომელიც წარმოადგენს საქართველოს მკვიდრთა ინტერესებს რუსეთში, ისევე როგორც საერთაშორისო რუსულ-სომხური „ლაზარევის კლუბის“ აქტიური წევრი, გულწრფელ ბოდიშს ვუხდი მთელ ქართველ ხალხს. და ვთხოვთ ყველას, რომ ეს უნებლიე გაუგებრობა, ეთნიკური სიძულვილის გაღვივებაში არ გადაიყვანონ.

საზოგადოებრივი ორგანიზაციის „რუსეთის ჯავახური დიასპორა“ პრეზიდენტი აღასი არაბიანი 2022 წლის 03 ნოემბერი.”