უფლებადამცველი, ბაია პატარაია სოციალურ ქსელში წერს:
„გულით მიხარია, რომ კიდევ ერთი გოგონა არ დავკარგეთ ამ უმძიმეს კვირაში და ვხედავ, როგორ ეწურება ხალხს გული, როცა ვერ ხერხდება მათი გადარჩენა. მაგრამ ამ ამბებს ხშირად ერთი საერთო ნიშანი აქვთ, ეს ერთი სიტყვა, რომელიც გამოკრთება ხოლმე ყველა ამბავში – ბავშვს “შეეშინდა”…
და ამის გამო მინდა გავაგონო ყველა მშობელს ამ ქვეყანაში: ისე გაზარდეთ შვილები, რომ მათ თქვენი არ ეშინოდეთ. მათ ხომ თქვენ გარდა არავინ ჰყავთ. ყველა პრობლემის მოსაგვარებლად ხომ თქვენ ეგულებით?! და თუ მათ თქვენი ეშინიათ, რჩებიან სრულიად მარტო და ზოგჯერ სასოწარკვეთილები ამ ცხოვრებიდანაც კი გარბიან…
გთხოვთ, ნუ შეაშინებთ ბავშვებს. ნუ შეაშინებთ პატარა ანგელოზებს, რომლებსაც ოჯახის მეტი არავინ ჰყავთ, ვისაც თავს შეაფარებდნენ.
არ არის საჭირო ბავშვების დასჯა. ბავშვს მხოლოდ სიყვარული ზრდის და თქვენ თუ დღეს ნორმალური და კარგი ადამიანები ხართ, არა იმიტომ რომ მშობლები გსჯიდნენ – მხოლოდ იმიტომ რომ მშობლებს უყვარდით. გახსოვდეთ, რომ აქამდე დისციპლინამ და დასჯამ კი არა – მხოლოდ სიყვარულმა მოგვიყვანა…“
ცნობისთვის, გუშინ, დიდ დიღომში 11 წლის გოგო გაუჩინარდა. რამდენიმე საათიანი ძებნის შემდეგ იგი უვნებელი იპოვეს.
კომენტარები