საპატრულო პოლიციის თანამშრომელი გიორგი დვალიშვილი, რომელმაც ლევან იზორიას ძმის დაკავებისა და მის გათავისუფლებას ჩარევის შემდეგ მისი გათავისუფლების ვიდეო გაასაჯაროვა, ამბობს, რომ მის ოჯახს უთვალთვალებენ. ამის შესახებ გიორგი დვალიშვილმა დღეს სახელმწიფო უსაფრთხოების შენობასთან გამართულ ბრიფინგზე განაცხადა. მისი თქმით, ის მზადაა, რომ საგამოძიებო უწყებებთან ნებისმიერ შემთხვევასთან დაკავშირებით ითანამშრომლოს.
დვალიშვილი მოუწოდებს, შესაბამის სამსახურებს, რომ შეწყდეს მისი ოჯახის თვალთვალი.
“მინდა მივმართო ბატონ გრიგოლ ლილუაშვილს, დაანებეთ თავი ჩემი ოჯახის თვალთვალს. თვალთვალი ჩემზე არ არის პრობლემა, მე დასამალი არაფერი არ მაქვს. მზად ვარ ახლაც შევიდე და ნებისმიერ კითხვას ვუპასუხო, თუ რამე აინტერესებთ. მე ვარ პოლიციელი და ნუ ქმნიან ჩემგან მტრის ხატს. მყავს სამი არასრულწლოვანი გოგონა, რომლებიც სისტემატურად იმყოფებიან ზეწოლის ქვეშ. თვალთვალი მათზე, ყოფნა სადარბაზოში, ეს უკვე ძალიან ზედმეტია”, — განაცხადა გიორგი დვალიშვილმა.
გიორგი დვალიშვილმა 23 იანვარს მთავარ არხს მიაწოდა 2014 წელს გადაღებული ვიდეომასალა, რომელშიც ჩანს, თუ როგორ აკავებს ის მაშინდელი შინაგან საქმეთა მინისტრის მოადგილის, ლევან იზორიას ძმას და როგორ აიძულებენ მის გათავისუფლებას ჩარევის შემდეგ.
მთავარი არხის ინფორმაციით, მომხდარის შემდეგ დვალიშვილს მაშინდელმა საპატრულო პოლიციის უფროსმა, კახა ბუხრაძემ ვიდეომასალის გადაგზავნა მოსთხოვა, რაზეც უარი უთხრა და განუმარტა, რომ ვიდეოს გამოძიებას გადასცემდა. მისი თქმით, ამის შემდეგ დევნა დაიწყო და ის ჩამოაქვეითეს.
კომენტარები