“გერმანიას ძალიან გაუმართლა რომ მისი ლიდერი დღეს ოლაფ შოლცია” – იონათამიშვილი

იშვიათად მეგულება ადამიანი, რომელმაც შეიძლება არ იცოდეს შვეიცარიის ნეიტრალიტეტის სტატუსის შესახებ. სწორედ ამ სტატუსის გამო შარშან შვეიცარიამ უარი განაცხადა გერმანიის ორ მიმართვაზე – მიეწოდებინა უკრაინისთვის საბრძოლო მასალა, რადგან შვეიცარია სტატუსის შესაბამისად, არ აწვდის შეიარაღებას ქვეყანას, რომელიც ომშია ჩართული. საქმე კი იმაშია რომ გერმანიამ უკრაინას გადასცა რამდენიმე ჰაერსაწინააღმდეგო სისტემით აღჭურვილი ტანკი „გეპარდი“, შვეიცარია კი „გეპარდისთვის“ აუცილებელ საბრძოლო მასალას (ჭურვებს) ამზადებს. უკრაინა თავის მხრივ განიცდის ამ საბრძოლო მასალის მწვავე დეფიციტს. გარდა ამისა, დანია და ესპანეთიც გეგმავს გერმანული „გეპარდების“ უკრაინისთვის მიწოდებას, თუმცა ამ პირობებში (ჭურვების დეფიციტში) ასეთ გეგმას აზრიც კი ეკარგება. გერმანიამ შვეიცარიასთან მიმართვის დროს ყურადღება გაამახვილა, იმ გარემოებაზე, რომ უკრაინა თავდაცვით ომშია, შემდეგ კი აღნიშნა, რომ თუ შვეიცარია უარს იტყვის უკრაინას შეიარაღებაზე, მაშინ ის (გერმანია) გადახედავს შვეიცარიასთან სამხედრო თანამშრომლობის საკითხს. დღეს შვეიცარიელი პოლიტიკოსები ახლოს არიან ისტორიულ გადაწყვეტილებასთან, რომ მონაწილეობა მიიღონ უკრაინის უსაფრთხოების გამტკიცებაში და მიაწოდონ უკრაინას მნიშვნელოვანი საბრძოლო მასალა. ამისთვის მათ, ნეიტრალიტეტის მქონე ქვეყანას განსაკუთრებული მადლობა, თუმცა გერმანიის პოზიტიური როლი ამ საკითხში ასევე ცალსახაა.”