გეების ნაცვლად სხვა ხალხია გალახული, ადამიანები არიან დაუცველები ბრბოს წინაშე, რომელსაც გეი და ოპერატორი ერევა ერთმანეთში – იაგო ხვიჩია

“გირჩის” ლიდერმა იაგო ხვიჩიამ თბილისში განვითარებული მოვლენების შეფასებისას ჟურნალისტებს განუცხადა:

“სამართალდამცავი სისტემა დღეს ჩაფლავდა და შესაბამისად, ადამიანები არიან დაუცველები სპეციფიური ბრბოს წინაშე, რომელსაც გეი და ოპერატორი ერევა ერთმანეთში.

ვცხოვრობთ სახელმწიფოში, მაგრამ მთლად ბოლომდე სამართლებრივში არა. ჩემი აზრით, სამართალდამცავი სისტემა დღეს ჩაფლავდა და შესაბამისად, ადამიანები არიან დაუცველები სპეციფიური ბრბოს წინაშე, რომელსაც გეი და ოპერატორი ერევა ერთმანეთში. შესაბამისად, მივიღეთ უპრეცედენტო შემთხვევა, საერთოდ რომ არ არიან ამ საქმესთან კავშირში, ისეთი ხალხი დაშავდა, მიზეზი კი არავინ იცის. შეიძლება ადამიანები ისე განაწყო, რომ ვიღაცას ისე მისდევდეს, ვინც შეხვდება იმას ურტყამდეს? ეს ძალიან სამარცხვინო ფაქტია და ჩემი აზრით, ყველა მონაწილე, რომელიც ამ პროცესს არ გაემიჯნება, როცა აზრზე მოვა, საკუთარი საქციელის ძალიან შერცხვება.

ჩემი აზრით, ყველაზე გალახული ამ სიტუაციიდან ხელისუფლება გამოდის. რეალურად, ეკლესიამ და ამ ხალხმა, რაც გააკეთა, არის იმის ჩვენება, თუ ვინ არის “ბოსი”. ამის მტკიცების პროცესს ვხედავთ ამ წუთში და გეების დევნა არის შირმად გამოყენებული საკუთარი უპირატესობის დასამტკიცებლად. ვერავინ დამაჯერებს იმას, რომ დღეს, 5 ივლისს არის დღე, როცა სიწმინდის დამცველი ქართველი ვაჟკაცები გეების წინააღმდეგ ერთბაშად ირაზმებიან ბუნებრივად და ამ დღეს აწვებათ რაღაცნაირად ყველანაირი ემოცია და ეს ემოცია იმდენად მძაფრია, რომ იღვრება პირველ შემხვედრზე, ისეთ უწყინარ ხალხზე, როგორებიც ჟურნალისტები და ოპერატორები არიან.

ხელისუფლებას და საპატრიარქოს სპეციფიური თანამშრომლობა ახასიათებს წლებია. ეს ურთიერთობა ხან ასეთია, ხან ისეთია. ზოგჯერ ხელისუფლება სჯის საპატრიარქოს რაღაც ფორმით, ზოგჯერ პირიქით, საპატრიარქო შურისძიებას აცხადებს ამაზე. დღეს საპატრიარქომ დასაჯა ხელისუფლება და შეარცხვინა მთელი მსოფლიოს წინაშე, მათ შორის, საკუთარი ნორმალური ამომრჩევლების წინაშე. იცის, რომ ახლა არის წინასაარჩევნო პერიოდი და იცის, რომ წინასაარჩევნოდ ეს გაუვა. მაგრამ ჩემი აზრით, დღეს ნებისმიერმა ადამიანმა ძალიან წააგო, ვინც იქ დღეს ღმერთის სახელით იყო გამოსული და იმას აკეთებდა, რასაც აკეთებდა. ეკლესიამაც წააგო, ჩემი აზრით იქედან გამომდინარე, რომ ჯერ არ მინახავს ნორმალური ადამიანი, რომელსაც ის მოწონებოდა, რაც ხდებოდა. ის ადამიანებიც კი, რომლებიც ჩვენდა სამწუხაროდ ტაშს უკრავენ გეების ცემას, დღეს ვერ იქნებიან ტაშის კვრის ხასიათზე იმიტომ, რომ გეების ნაცვლად საერთოდ სხვა ხალხია გალახული.”