“გახარიას პარტია ივანიშვილის მხარესაა”– ვახო სანაია

ჟურნალისტი, ვახო სანაია:

,,ჩვენი პარტია „ოცნების“ არალეგიტიმურ პარლამენტს ლეგიტიმაციას არ მისცემს, წერტილი ! “

იმაზე არაფერს ვამბობ, რომ სიტყვა გატეხა. არც იმაზე, რომ ,,არ მისცემს” კი არა, ვერ მისცემდა და ვერც მისცა ლეგიტიმურობა. ეგ ლეგიტიმურობა სხვაგანაა, ხალშია და არა გახარიაში ან რომელიმე სხვა პარტიაში.

რა არის ამ ყველაფერში მნიშვნელოვანი. ეს პარტია, რომელმაც თავი დაისამარა ,,პარლამენტში” შესვლით, მონაწილეობს უკანონობაში. პარლამენტი არ არის ლეგიტიმური, ამას თავადვე აცხადებდნენ. ესე იგი, უკანონოა. ისინი კი უკანონობის ნაწილი გახდნენ. უზურპირებული ძალაუფლების შემადგენლად იქცნენ.

ქართული ოცნებისა და გახარიას მიზნები ერთი და იგივეა – ივანიშვილის გამარჯვება. ისინი შევიდნენ არალეგიტიმურ პარლამენტში (მათივე სიტყვებია), ესე იგი, სურთ, რომ ის აქციონ ლეგიტიმურ ორგანოდ. ანუ ყველაფერი უნდა გააკეთონ, რომ ლეგიტიმურები გახდნენ, რადგან თუ პარლამენტი არალეგიტიმურია, თავად გახარიას პარტიის ,,დეპუტაციაც” არალეგიტიმურია. ამ პროცესში თავისი თავის წინააღმდეგ ხომ არ იმოქმედებენ ?! შესაბამისად, ერთი და იგივე ამოცანა აქვთ. მათაც ზუსტად ის მოტივაცია ამოძრავებთ, რაც ივანიშვილს.

მათი სურვილი ხალხის ინტერესს ეწინააღმდეგება. იზოლაციის გარღვევისა და უკანონო პარლამენტის ,,კანონიერად” ქცევის გზა მათთვის ხალხის დამარცხებაზე გადის, რადგან ხალხის გამარჯვება მათ და ოცნებას ერთად დაასრულებს. აქედან გამომდინარე, ისინი ხალხის კი არა, ივანიშვილს მხარეს არიან.