საქართველოს ერთპარტიული პარლამენტის მიერ დაჩქარებული წესით მიღებულ FARA-ს კანონთან დაკავშირებით ეუთოს ადამიანის უფლებების ოფისი ოფიციალურ განცხადებას ავრცელებს – ODIHR წერს, რომ კანონი ზრდის შეშფოთებას იმ ნეგატიური გავლენის გამო, რომელიც მას სამოქალაქო საზოგადოებაზე ექნება.
ODIHR-ის დირექტორი, მარია ტელალიანი პირდაპირ აცხადებს, რომ “კანონი სამოქალაქო საზოგადოებასა და ყველა იმ ორგანიზაციას, რომელიც ადამიანის უფლებების დაცვის კუთხით მუშაობს, დიდ დარტყმას აყენებს”.
სამოქალაქო საზოგადოება სასიცოცხლოდ მნიშვნელოვანია ყველა დემოკრატიისთვის და ნებისმიერი ახალი მოთხოვნა საერთაშორისო სტანდარტებთან შესაბამისად უნდა აძლიერებდეს მათ საქმიანობას და არა შეზღუდვებს უწესებდეს”. – განაცხადა მარია ტელალიანმა.
ODIHR ივანიშვილის რეჟიმის მიერ FARA-ს ამერიკული ანალოგიდან სიტყვა-სიტყვით გადმოტანასაც ეხმაურება და წერს, რომ კანონის ერთი ქვეყნიდან მეორეში გადატანა უნდა მოხდეს სიფრთხილით.
აშშ-ის კანონმდებლობა უზრუნველყოფს, რომ დარეგისტრირდნენ ის კერძო კომპანიები ან არასამთავრობო ორგანიზაციები, რომლებიც უცხო ქვეყნის სახელით ლობისტურ ან ადვოკატირების საქმიანობას ეწევიან და ეს ინფორმაცია საჯაროდ იყოს ხელმისაწვდომი. კანონმდებლობის ერთი ქვეყნიდან მეორე ქვეყანაში გადატანა ყოველთვის სიფრთხილით უნდა მოხდეს და ის უნდა განიხილებოდეს უფრო ფართო ეროვნულ ინსტიტუციურ და სამართლებრივ კონტექსტში”. – წერია განცხადებაში.
ეუთოს ადამიანის უფლებების ოფისი “ქართულ ოცნებას” მოუწოდებს, ყურადღებით გადახედოს და გადააფასოს კანონში გაწერილი თითოეული პუნქტი.
ეუთოს წევრმა ქვეყნებმა შეკრების, გაერთიანებისა და გამოხატვის თავისუფლების დაცვის ვალდებულება აიღეს. მათ ასევე აღიარეს ადამიანის უფლებების, დემოკრატიისა და კანონის უზენაესობის წინ წასაწევად სამოქალაქო საზოგადოების მნიშვნელობა. მაშინ, როდესაც ლობისტური საქმიანობის რეგულირება მნიშვნელოვანი ინსტრუმენტია საჯარო გადაწყვეტილებების მიღებაში გამჭვირვალობისა და სამართლიანობის უზრუნველყოფისა და კორუფციის პრევენციისთვის, მან პატივი უნდა სცეს ამ უფლებებს და არ უნდა არღვევდეს პოლიტიკურ და საჯარო მონაწილეობას”, – ნათქვამია განცხადებაში.
კომენტარები