ეს გვირაბი თუ გაკეთდა, მესტია შვეიცარიის დონის კურორტი გახდება – გურჩიანი

ფოტო – bm.ge

მესტიაში მდებარე სასტუმრო „გისტოლას“ დამფუძნებელი ირაკლი გურჩიანი BMG-თან საუბრისას ამბობს:

„ჩვენ კი ვემზადებით ზამთრის სეზონისთვის, მაგრამ ჯავშნები ჯერ ნამდვილად არ არის იმიტომ, რომ ძალიან ძნელია სვანეთის ზამთრის კურორტად გარდაქმნა. ავტობუსით კი 12 საათი უწევს ადამიანს თბილისიდან ჩასვლა, ქუთაისიდან 5 საათი, აქედან გამომდინარე სანამ ის გვირაბი არ გაკეთდება ქუთაისიდან, რომელიც დაპროექტებულია, მანამდე ძალიან ძნელია განვიხილოთ სვანეთი როგორც ზამთრის კურორტი. არცერთი უცხოური ტურისტული სააგენტოსთვის ამხელა გზაზე ტურის დაგეგმვა არ არის პრიორიტეტული. წარმოიდგინეთ 3 დღით რომ წავიდეს ადამიანი, ორი დღე გზაში უნდა იყოს.

სვანეთი რომ გადაიქცეს კურორტად, მას აქვს უზარმაზარი პოტენციალი თუ გაკეთდება ის გვირაბი, რომლის პროექტი დევს, თუმცა გაჩერებულია, ის რომ გაკეთდეს სახელმწიფოსგან ბიზნესს მერე აღარანაირი დახმარება აღარ დაჭირდება. თბილისელებიც ივლიან ისე როგორც გუდაურში. ქუთაისიდან სვანეთისკენ გვირაბი თუ გაკეთდა, მაქსიმუმ 3სთ-ში იქნები მესტიაში, რაც მერე გახდება შვეიცარია.

გარდა ამისა, ელექტროენერგიის პრობლემა ახლაც არის, მაინერებიც არის, რის გამოც დაბალი ძაბვაა, ასევე ინტერნეტი არაა, არის მარტო მობილური ინტერნეტი, რომელიც ძალიან სუსტია”, – განაცხადა ირაკლი გურჩიანმა.

აღსანიშნავია, რომ გურჩიანი ქუთაისის აეროპორტიდან სვანეთის მიმართულებით უმოკლესი გზის პროექტზე საუბრობს. აღნიშნულზე საავტომობილო გზების დეპარტამენტის თავმჯდომარე გიორგი სეთურიძე 2017 წელს აცხადებდა, რომ საბოლოო ვარიანტი მთავრობას 2018 წელს უნდა წარდგენოდა.

წყარო – bm.ge