“ეს განაჩენი უნდა გაუქმდეს, მოსამართლე, რომელმაც ასეთი დარღვევა დაუშვა, გასაგდებია” – ზაზა ხატიაშვილი ქართულის არმცოდნე პირის თარჯიმნის გარეშე გასამართლებაზე

გუშინ, 10 იანვარს ალიამ გამოაქვეყნა მასალა სათაურით, სკანდალი სასამართლოში – უპრეცედენტო დარღვევები და “სააპელაციოში” მტკიცებულებების გარეშე დარჩენილი საქმე, სადაც საუბარია არაერთ დარღვევაზე, მათ შორის, ფუნდამენტური უფლების, პირს ბრალი გაეცნოს მისთვის გასაგებ ენაზე, უგულებელჰყოფაზე. მოქალაქე ნ.ა., რომელიც არ ფლობს ქართულ ენას გაჩხრიკეს, დააკავეს, გაასამართლეს კიდეც თარჯიმნის გარეშე. ამჯერად საქმეს სააპელაციო სასამართლო განიხილავს, სადაც ადვოკატებმა ნათია ჩხეტიანმა და სოფო ბონდარენკომ, რომლებიც სააპელაციო პროცესისას ჩაერთვნენ საქმეში, თარჯიმნის შუამდგომლობა დააყენეს, მოსამართლემ, ვახტანგ მრელაშვილმა დააკმაყოფილა შუამდგომლობა, თუმცა, თარჯიმნის დანიშვნა ისედაც მისი ვალდებულება იყო და ამას შუამდგომლობა არ სჭირდებოდა. გამომდინარე იქედან, რომ მოსამართლე ვალერიან ბუგიანიშვილმა საქმე საქალაქო სასამართლოში განიხილა ისე, რომ ენის არმცოდნე პირს, თარჯიმანი არ დაუნიშნა, გამომდინარე იქედან, რომ თარჯიმანზე არც პროკურატურას და შსს–ს უზრუნია, ყველა მტკიცებულება, კანონდარღვევით შედგენილი გამოდის. რას გადაწყვეტს სააპელაციო სასამართლო, ეს მალე გამოჩნდება, თუმცა, ეს არ ცვლის საქალაქო სასამართლოს, პროკურატურის თუ შსს–ს მიერ კანონის, ადამიანის უფლებების უხეშ დარღვევას.

ალიას მომხდარზე ესაუბრება საქართველოს ადვოკატთა ასოციაციის ყოფილი თავმჯდომარე, ადვოკატი ზაზა ხატიაშვილი და ამბობს:

ეს არის ისეთი დარღვევა, რომელიც აუცილებლად განაჩენის გაუქმებას მოითხოვს. პირს, მისთვის გასაგებ ენაზე რომ უნდა განემარტოს ბრალდება, ამას ამბობს საქართველოს სისხლის სამართლის საპროცესო კოდექსი, კონსტიტუცია, ადამიანის უფლებათა ევროპული კონვენცია, თუმცა მურუსიძე–ჩინჩალაძის სამართალთან, არ ვიცი, რა უნდა ვთქვა. 

წლები ვიყავი ადვოკატთა ასოციაციის თავმჯდომარე და არა, ნამდვილად არ მსმენია მსგავსი რამ მომხდარიყოს საქართველოში, სააკაშვილის რეჟიმის დროსაც კი, როცა კოლექტიურად ასამართლებდნენ ადამიანებს, ასეთი დარღვევის შესახებ, არ მსმენია. ერთი ძველი საქმე ვიცით ასეთი, ბროზოვიჩი იტალიის წინააღმდეგ, იქ იყო ასეთი წარმოუდგენელი დარღვევა, ეს საქმე ევროპის ადამიანის უფლებათა სასამართლომ განიხილა და ხმაურიანი პროცესი იყო. 

გამორიცხულია სააპელაციო სასამართლომ ეს განაჩენი არ გააუქმოს, საერთოდ როგორ შეიძლება რაიმე სახის მტკიცებულებებზე საუბარი, ასეთი დარღვევის შემდეგ? – ადამიანს დაერღვა თავის დაცვის უფლება. ეს იცით როგორი დარღვევაა? – მოსამართლის მაგიერ მექანიკოსმა რომ გამოუტანოს განაჩენი – ამ ტიპის დარღვევაა, ადამიანი ისე გაასამართლეს არ იცოდა თავისი ბრალდება. 

ყველა ვარიანტში უნდა გააუქმოს სააპელაციო სასამართლომ საქალაქო სასამართლოს განაჩენი, გამორიცხულია განაჩენი რომ დარჩეს ვადაში, მაგრამ ეს არ არის საკმარისი, დაცვის მხარემ იუსტიციის საბჭოში და სადისციპლინო კომისიაში საქალაქო სასამართლოს იმ მოსამართლეს უნდა უჩივლოს, ვინც ასეთი წარმოუდგენელი დარღვევა დაუშვა. ამ მოსამართლეს აღარ უნდა მიეცეს საქმის განხილვის საშუალება. ეს მოსამართლე გასაგდებია სასამართლოდან.

სკანდალი სასამართლოში – უპრეცედენტო დარღვევები და “სააპელაციოში” მტკიცებულებების გარეშე დარჩენილი საქმე – “ალიას” ექსკლუზივი