“ალიას” ესაუბრება ანალიტიკოსი, პოლიტოლოგი, გია ხუხაშვილი
– ადამიანებს, რომელთა სავარაუდო საუბრის ჩანაწერები გავრცელდა, თქვენ პირადად იცნობთ, როგორ გგონიათ, მათი ფსიქოტიპიდან გამომდინარე, ამის გამკეთებლები იყვნენ?
– მე ბერას ვიცნობდი, როგორც ბავშვს, როგორც ძალიან კარგ, ზრდილობიან ბავშვს და აღფრთოვანებული ვიყავი მისი თავმდაბლობით. იმის შემდეგ რა მოხდა, რა შეიცვალა, არ ვიცი, აღარ მაქვს კომუნიკაცია. კომენტარს ვერ გავაკეთებ, ახლა უკვე კაცია, ცოლ-შვილი ჰყავს.
– ღარიბაშვილი და ჩუბინიძე?
– ხელისუფლება ვერ სარგებლობს უდანაშაულობის პრეზუმციით. თუ ის ჩანაწერი, რაც მოვისმინეთ ავთენტურია, შესაძლოა, გავრცელებული ჩანაწერი შეიცავდეს დანაშაულის ნიშნებს – ღირსეული ადამიანი, თუ ის თვლის, რომ მართალია, თავად უნდა იყოს დაინტერესებული შესაბამისი გამოძიებით. მით უმეტეს, რომ, ვიმეორებ, ხელისუფალი, ვერ სარგებლობს ჩვეულებრივი მოქალაქისგან განსხვავებით უდანაშაულობის პრეზუმციით. ახლა ვიღაცები კი არ უნდა ამუნათებდნენ ღარიბაშვილს, გამოძიება დაიწყეო, ხელისუფლების ინტერესებშია რომ გამოიძიოს, დაამტკიცოს თავისი სიმართლე და ეჭვები გააქარწყლოს. ასე იქცევა ცივილიზებული, ნორმალური ხელისუფალი. როცა ასეთი მძიმე ბრალდება ისმის და შენ გამოძიებას არ აპირებ, უკვე ირიბად ადასტურებ, რომ შენ ხარ დამნაშავე. მეტი არაფერი ხდება. ეს ხდება.
– და თუ დააგვიანებს გამოძიებას დაწყება, რომც გამართლდეს, უკვე საზოგადოების დარწმუნება გაუჭირდება.
– კი, ბატონო, ნდობა დაბალი იქნება. ამიტომ თვითონ უნდა იწყებდნენ გამოძიებას. მაგრამ რატომღაც ამას არ აკეთებენ, რითაც აძლიერებენ ეჭვებს. ჰყავს ხელისუფლებას ადამიანები, რომლებიც ყველაფერს ბოდიში და „აპრავებენ“, ამით რომ დათვურ სამსახურს უწევენ ხელისუფლებას, ამას ვერ ხვდებიან. ან არ აინტერესებთ, თავის ჭიას ახარებენ, თავისი 2 კაპიკი ამ საქმეში აქვთ და არიან ბედნიერები. „გამპრავებლობა“ არის პროფესია დღეს, ანაზღაურებადი პროფესია. უმუშევრობაა ქვეყანაში, არ არის სხვა სამსახური და…
– რატომ გამოქვეყნდა ახლა, ვის წისქვილზე ასხამს ახლა ამ ჩანაწერის გამოქვეყნება? ვინ იხეირებს?
– ქვეყნისთვის ეს არის ძალიან ცუდი. ოპოზიციას კი სურს ხელისუფლების დისკრედიტაცია, მაგრამ არსებობს სახელმწიფო ინტერესებიც. კომპრომიტირებული ხელისუფლება ქვეყნისთვის ძალიან დამაზიანებელია. ღარიბაშვილი პატრიოტია, ქვეყანა უყვარსო, ამბობენ ფეისბუქის ლომები, მაგრამ 2011 წლამდე მე ღარიბაშვილის პატრიოტიზმი არ გამიგია, აი, მერე დააზეპირებინეს პატრიოტი უნდა იყო, კარგიაო, თორემ, მანამდე, სანამ ჩვენ ვიბრძოდით, ღარიბაშვილის ბუნდღა არ იყო. ახლა კეთილი ინებოს და გადადგას კაცური ნაბიჯი, ან გადადგეს, ან გამოიძიოს, აარიდოს ქვეყანა ასეთ კომპრომატირებულ პრემიერს, მაგრამ მისი პატრიოტიზმი მისი სავარძლის სიყვარულია.
– თქვენი აზრით, ვინ არის გამავრცელებელი, ვის აწყობდა ეს?
– დარწმუნებული ვარ, შიგნიდან გავრცელდა, მიშასკენ კი იშვერენ ხელს, მაგრამ ციხე შიგნიდან გატყდა. მე ჩემი ვარაუდი მაქვს ამასთან დაკავშირებით. ჩემი აზრით, სპეცსამსახურების საშუალო რანგის წარმომადგენელი შეიძლება იყოს გამავრცელებელი, ვიმეორებ საშუალო რანგის და არა დაბალი რანგის წარმომადგენელი. ის, ვინც ფიქრობს, რომ ხელისუფლება მალე შეიცვლება და უნდა შემდეგ ხელისუფლებაშიც დადოს კვერცხები. საერთოდ, ამ ტიპის მასალებთან თითქმის ყოველთვის სუს-ია კავშირში, ის ადამიანები, ვისაც წვდომა აქვს ასეთ ფაილებზე. ახლა ვიღაც ცდილობს კავშირი ჰქონდეს მომავალ ხელისუფლებასთან, რადგან, ფიქრობს, ხელისუფლების ცვლილების შემდეგ, შესაძლოა, სამსახურიდან გააგდონ, ან დაიჭირონ და თავს იზღვევს. ასეთი იყო ბედუკაძის ისტორიაც, იმანაც თავის დროზე ჩვენთან დადო კვერცხები და ლამის გმირად შერაცხეს ამის გამო, არადა, თავად იყო ყველაფერი იმის მონაწილე, რაც ხდებოდა.
– და მაინც, როდინდელია ჩანაწერი გგონიათ? 2010 წლის დროინდელიაო, ამტკიცებენ „ოცნების“ მომხრეები…
– იმის მტკიცება, რომ ეს 2010-2011 წლის ჩანაწერი შეიძლება იყოს, არადამაჯერებელია. მე თავად ვიყავი პროცესებში მაშინ ჩართული და ზუსტად ვიცი, ეს ჩანაწერი რომ ჰქონოდა მიშას, 2012 წელს დაიჭერდა ღარიბაშვილს, ჩუბინიძეს და შესაძლოა, ბერაც კი დაეჭირა. ჩვენ სრულ დისკრედიტაციას მოახდენდა. იმის ფიქრი, რომ მიშას ჰქონდა ეს ჩანაწერი და 2021 წლამდე შეინახა, სისულელეა, ვიღაცა ჭამს ბიძინა ივანიშვილის ამ ზღაპრებს, და ვიღაცა არ ჭამს.
– გაგრძელდება კიდევ ჩანაწერების გავრცელება?
– ისეთი საგიჟეთია ახლა, ყველაფერს უნდა ველოდოთ.
ალია
კომენტარები