ლევან ჯავახიშვილი
„ალიას“ ესაუბრება პოლიტიკური მოძრაობა „ტრიბუნას“ ლიდერი, დავით ჭიჭინაძე.
– საპარლამენტო ოპოზიცია, სოსო გოგაშვილის მიერ მოქმედ ჩინოვნიკებზე, ბიძინა ივანიშვილზე გავრცელებული ინფორმაციების გამოძიების მიზნით, საპარლამენტო კომისიის შექმნას მოითხოვს. როგორ ფიქრობთ, ღირს მისი შექმნა? რაიმე შედეგს მოგვცემს ეს კომისია?
– ეს არის „ლელოს“ ინიციატივა და ამ პარტიის ყველა ინიციატივა, რეალობას აცდენილია. თუ რაიმეს შეცვლა უნდათ, ადგნენ და საბანკო სისტემაში არსებული დანაშაულებრივი საქმიანობის შემსწავლელი საგამოძიებო კომისია შექმნან. კი, კარგია გოგაშვილის მხილებების თაობაზე კომისია თუ შეიქმნება, გოგაშვილსაც ტრიბუნა მიეცემა და რაც თქვა, იმ სავარაუდო ფაქტებსაც გამოიძიებენ. ეს ერთი მხარეა, მაგრამ ვფიქრობ, ამას მხოლოდ პიარისთვის თუ გამოიყენებენ ინიციატორები, სხვა არაფერი მოხდება და არანაირი კომისია არ შეიქმნება. 50 დეპუტატის ხმა უნდა კომისიის შექმნას, რეალურად, შეუძლიათ ამ რაოდენობის ხმების მოგროვება ოპოზიციას. მაგრამ ხომ იცით, როგორც ხდება? ერთი მოისმენს, მეორე – გაატარებს, ვიღაცა „ქართულ ოცნებას“ გაურიგდება, ხმას არ მისცემს ამ კომისიის შექმნას და საბოლოოდ, ესეც დავიწყებას მიეცემა. საგამოძიებო კომისია შექმნან, გამოიძიონ, ეროვნული და კომერციული ბანკები, შეთანხმებულად რომ ატყავებენ საპროცენტო განაკვეთებით ხალხს, ლარის კურსის მუდმივი თამაშით და ხალხს წელიწადში რამდენჯერმე ჯიბიდან მილიონებს აცლიან. ლარის გაუფასურების გამო ყველაფერი რომ ძვირდება, ხალხი ამით რომ ღატაკდება, ამაზე შექმნან საგამოძიებო კომისია. აგერ, ხალხი ქუჩაში რჩება, ბინებს და სახლებს უყიდიან კერძი მევახშეები და ეს საქმე შეისწავლონ. რა ვქნა, რა ინიციატივაც „ლელოსგან“ მოდის, არ მჯერა, რომ ისინი ხალხის კეთილდღეობისთვის არის გამიზნული. ხალხზე მზრუნველი ბანკირებისა არ მჯერა და ერთს ასეთს თუ იპოვნით და გამაცნობთ, დიდად დამავალებთ. ბანკირი ხალხის მხარეს არასოდეს არ ყოფილა და არც იქნება, ბანკირი არ იქნება სახალხო პოლიტიკის მწარმოებელი. „ლელოს“ ბანკირებზე მდიდარი ბანკირი კი გვყავს ხელისუფლებაში და რასაც წარმოადგენს, რა დღეში ჩააგდო ქვეყანა, ყველანი ვხედავთ. ერთი კომისია რაზე უნდა შექმნან, იცით? აი, ბიძინა ივანიშვილის სახლში რომ იყვნენ მამუკა ხაზარაძე, ვანო ჩხარტიშვილი, ირაკლი შოთაძე და ქვეყანას რომ იყოფდნენ თუ რასაც აკეთებდნენ, მაგის გასარკვევად. ეს თავად ხაზარაძემ მოჰყვა ტელევიზიით. რა უნდოდათ იქ, რაზე ჰქონდათ ლაპარაკი, რა უნდოდა იქ გენპროკურორს, ამაზე ლაპარაკი არ უნდათ. ბოლოს იმას ვიტყვი, რომ მევახშეებს ხალხი რომ აღარ გამოესახლებინათ სახლებიდან, კანონი მივიღეთ და მათ აეკრძალათ იპოთეკური სესხის გაცემა. ადგნენ და მოძებნეს გამოსავალი – ნასყიდობა-გამოსყიდვის ხელშეკრულებით გასცემენ სესხებს და უამრავი ოჯახი დატოვეს ისევ ქუჩაში, უკანასკნელი საცხოვრისი გაუყიდეს. ხედავენ ამ პრობლემას, ამ გაუბედურებულ ხალხს და ხმას არ იღებენ. მოიძებნა კანონში ხვრელი? ადექი და ამოქოლე, ახალი კანონი მიიღე და აუკრძალე ამ ნასყიდობა-გამოსყიდვის საფუძველზე ფულის გასესხება. არა, ამაზე ხმას არ იღებენ, რადგან ის კერძო მევახშეები ბანკებისა და მიკროსაფინანსო ორგანიზაციების ფულს ატრიალებენ, მათი მეწილეები კი პოლიტიკაში არიან და მსხვილ პროცენტებს უხდიან ის კერძო მევახშეები. კიდევ „ქართული ოცნების“ რამდენი მევახაშე დეპუტატია და მათი ფულიც ტრიალებს, მათაც დიდი ხეირი აქვთ. ბავშვები ქუჩაში რჩებიან. რუსეთშიც კი დაცულია ამ მხრივ ბავშვთა უფლებები. ვერც ბანკი, ვერც კერძო მევახშე სახლს თუ ბინას ვერ გაუყიდის მევალე მშობლებს, თუ ბავშვს არ დაუტოვებენ მცირე წილს, მცირე ადგილს, ერთ პატარა ოთახს მაინც, სადაც ბავშვი იცხოვრებს. ბანკები გამოდიან და აცხადებენ, ჩვენ რამდენი ხანია არავინ გამოგვისახლებიაო – სტატისტიკას იუმჯობესებენ. რა მნიშვნელობა აქვს, ბანკი გამოასახლებს თუ კერძო მევახშე, რომელიც ბანკის ფულით მუშაობს?!
კომენტარები